董特首嘅問責班子，成日話面向市民，但係有一樣嘢，似乎佢要先教一教所有局長，就係唔好再做錄音機！何出此言？事關尊貴嘅民政事務局局長何志平噚日就示範咗一次如何做人肉錄音機。
街工議員梁耀忠噚日喺立法會問咗何局長一條問題，質疑點解大會堂之前喺一個法輪功學員章翠英嘅畫展上，唔畀人派一本六十頁畫冊？何局長初時話，因為有人違反咗租場規則，做一啲與畫展無關嘅事，所以先會發出口頭同書面警告。
不過阿忠發現，六十頁嘅畫冊有四十幾頁係章小姐嘅中國畫，只有少少其他資料，講緊嘅當然係同法輪功有關嘅資料啦，點解咁嘅畫冊都唔畀派？
何局長不停揭貓紙，終於又再重讀一次之前嘅講稿！阿忠當然唔放過佢啦，結果佢惟有話：「據了解，呢本畫冊的確係一本畫冊……但係其中有啲內容與畫展無關！」八方聽到咁嘅答案，真係佩服佩服，局長的確係一個局長，官的確係官。
唔知何局長係咪太緊張，噚日除咗冇晒招牌笑容外，重讀錯字，話個畫展係八月「下唇」舉行，而唔係「下旬」，幸好主席范太見咁多人圍攻咗何局長十幾分鐘，出手叫停，否則一個人企喺度接招又真係唔易受。
傳真︰2623-9278
電郵︰