陳奕迅 ：我知道消息，我唔識法律，判刑嗰啲唔知咁多。我唔會咁快call霆鋒住，都冇佢屋企電話，等佢唞吓先啦！呢樣嘢唔使特別慶祝，同佢耐冇見，遲啲都會見吓面。其實我早排都寫咗封英文信去壁屋，同佢講「大個仔要乖！」支持佢。
王菲經理人陳家瑛 ：冇乜特別感覺，但我覺得霆鋒媽咪狄波拉最辛苦，病都要陪個仔上庭，日日去探監，重話去埋泰國拜神，勞心勞力。我自己都係媽媽，好明白佢媽媽嘅感受，希望霆鋒以後要好好孝順媽媽啦。
沈殿霞 ：開心死囉！我都會打畀拉姑問候吓，我覺得個判決好合理，之前佢入咗去兩個禮拜聽到都好心酸，希望佢好好咁服務社會。
汪明荃 ：咁就好，個官都係睇嚴重性去判，法官經咁多資料判出嚟嘅結果，大家就要接受，法官係公正嘅，其他人知啲唔知啲。
薛家燕 ：終於可以鬆一口氣囉，重擔心佢要坐監，其實個官都畀機會佢，之前兩個禮拜對佢係好大打擊，自己會醒覺對任何事要負責任，知錯能改係好事，個警察可能知法犯法，所以嚴重啲。
霆鋒前女友趙學而 ：其實呢兩個禮拜對佢同佢屋企人都好大壓力，我都替佢哋開心，尤其佢係年輕人偶像，帶咗好多訊息畀年輕人，二百四十小時其實都好正面。