政府財赤高企，財爺梁錦松自然要諗計，一招將「經濟效益低」之基建項目拖下馬，即刻俾人「將軍」；估唔到一計不成，二計又生，有人又借勢放風話認真考慮開銷售稅，今次就俾班議員笑政府拎把「善良的槍」出來獻世！
有商界議員同八方講，佢哋都知阿松諗計諗爆頭，但要搵橋「大」班議員，都唔該搵啲實際少少嘅武器，係人都知自由黨唔支持銷售稅，就算阿松搞掂田少同周梁淑怡，佢又搞唔搞得掂民建聯、工聯會先？
又當阿松真係叻到曉飛，明年三月宣布研究開徵銷售稅，咁民主黨真係要多謝佢，因為明年底選區議會，阿松變相送「子彈」畀民主黨打民建聯，所以左計右計，銷售稅根本係一支「善良的槍」，唔開得，又冇阻嚇力，唯一係顯示阿松今次真係黔驢技窮！
傳真︰2623-9278
電郵︰