英國賭風席捲校園！連人之患嘅老師都賭埋一份，真係世風日下。話說新特蘭會長梅利個女讀嗰間私校真離譜，有兩個老師早排從小妮子口中收到風，事先知道韋健遜會執教新特蘭，於是一早就落注一百鎊買韋健遜係新特蘭領隊繼位人選，結果就贏到六千幾鎊（約七萬二千港元），都咪話唔和味。
梅利事後就一口咬定事有湊巧，但坊間傳言佢應該係響屋企同人傾偈時，畀個女聽到韋健遜會教佢隊波。所以我求大俠覺得佢唔應該響屋企傾咁重要嘅嘢，抵鬧；更抵鬧當然係兩位老師啦，佢哋嘅行為真係枉稱為人師表。
艾歷臣舊愛歐麗嘉最近就利用佢同艾歷臣嘅關係出自傳，撈到油水，不過螳螂捕蟬，黃雀在後，有個英國健身運動員連奴失驚無神走出嚟爆料，話佢同歐麗嘉有一手，重將佢哋兩人之間嘅做愛過程形容得好細緻，引人入「性」，將歐麗嘉形容得鬼咁放蕩。睇嚟呢位哥仔都想渾水摸魚，出番本書賺番筆都唔定噃。
英格蘭足總日前判堅尼停賽五場，查實唔算嚴厲（因為之前有人估佢可能要停八場），之但係最過癮都係英足總醒目，停賽令並唔係即時執行，而係由下個月初，亦即係堅尼嘅傷差唔多好番晒開始計起。所以曼聯想走精面，等堅尼一邊養傷、一邊停賽，實際上坐少啲波監嘅奸計無法得逞啦。
葡萄牙球王費高突然間宣布考慮退出國際賽，理由係佢覺得葡萄牙足總高層做嘢無計劃，一團糟。計我話葡萄牙兩年後就會主辦歐洲國家盃，斷估費高點都唔想錯過呢個響鄉里面前表現自己嘅機會啩？再講，佢年紀都唔細，踢大賽機會無多啦。所以我認為費高呢番話嘅動機，某程度上係鞭策足總做得好啲，我諗費高擁躉暫時唔使太擔心嘅。
中國男籃教練王非近日慘遭雙重打擊，先因中國隊喺亞運爆大冷輸咗畀南韓後，俾國內傳媒同球迷口誅筆伐。點知佢回國後，又突然收到喪父嘅噩耗。原來王父喺十日前去世，為免王非分心，家屬一直把佢蒙在鼓裏。其實我求大俠亦好同情王非嘅處境，佢冇功都有勞，而且輸波亦非佢一人之責，球員本身亦難辭其咎。
逢周一至周五見報