經過前日急升後，大市升勢轉緩，恒指升122點，收9459。杜指4日之內彈跳970點，恐怕要唞唞氣。港股暫時唔易升破9600，上便水位有限，炒輪要睇位做嘢。
滙豐（005）喺紐約做過87元以上，嗰便個價通常都高過本港個價，不足為奇。滙豐收85.50元，升1元，可能重有機會上多幾個位，到時要做嘢嘅話就係吼啲Put輪。太近期嘅Put輪要避開，驚住時間因素不利，例如9123，得半個月時間，溢價去到3.8%，輸面大過贏面，應該吼吓9431，隻輪明年2月到期，現價42仙，溢價10.2%，槓桿率20.4倍。9365，12月初到期，平水咁滯，相當抵買，衰在交投太靜。
新地（016）最高49.50元，收48.30元，只係爬高1格。連番大升，調整一下好正常。新地Call輪有貨喺手嘅話，應該放出去游水，等平啲至買番。
新地Put輪昨日並冇跟正股上升而下跌，反而硬淨，主角9531收47.5仙，升2仙，明年3月到期，溢價14.6%，槓桿率10.2倍。昅住呢件，吼低位上車。另外9529亦可留意，亦係明年3月到期，現價68仙，溢價10.6%，槓桿率7.1倍。新地Put輪如果再跌，有得諗。
章盛