我大口羅拉啱啱買咗優香主演嘅電影《戀中唱歌》嘅寫真集，如果你重問本書會唔會有優香嘅水着相，一定會俾人笑你out，事關套片擺明硬銷優香嘅笑容同埋超娘造型。
優香呢齣愛情歌舞片走合家歡路線，絕對唔使佢食老本行性感，本寫真集主要影吓優香喺澳洲拍片嘅情況，佢着住啲阿拉伯服裝，個娘樣富貴得嚟又幾鬼似我哋個好姨喎！不過最頂癮係高潮嗰場載歌載舞嘅戲，簡陋廠景加優香、燈神竹中直人同情人玉山鐵二，再加埋一班無厘頭伴舞，個feel十足十有「好似太陽出來了」嘅感覺。
齋睇劇照，大口羅拉覺得如果咁嘅電影喺日本收得嘅話，都可算係奇迹囉！今次雖然係由導演金子修介執導，但如果冇竹中直人撐住，吸引力對我嚟講絕對係零！