四十二歲任職地盤散工的冼木根，日前在灣仔警察總部第三座興建中的大樓內進行釘板工作期間，意外跌落電梯槽底下喪生，新寡黃伙妹剎那間無法接受丈夫的死訊。刻下還要為亡夫的殮葬費用奔波，更憂慮無力供養兩名年幼的兒子，感到前路茫茫。
「嗰日朝早我哋成家人重一齊食早餐，點知返工冇耐，就接到電話，話我老公出咗事。到𠵱家我都接受唔到佢嘅死，每晚都瞓唔着覺，一睇到佢啲衫褲同埋枕頭，我又忍唔住會喊。呢幾日雖然心情平復咗少少，但始終都係食唔落嘢，惟有食住啲粥水。」臉容疲憊的阿妹憂心忡忡地說。
黃伙妹現四十二歲，與從事地盤散工二十年的丈夫結婚多年，育有兩名十二歲及六歲的兒子，其夫每月收入約一萬多元，乃家庭的經濟支柱，一家四口生活尚算安穩。但自從兩、三年前開始，受經濟不景影響，經常出現開工不足的情況，更試過連續數個月「冇工開」，有賴僅餘的積蓄及親友接濟。
「嗰陣時啲仔成日唔舒服，每個月都要同佢哋睇幾次醫生，平時淨係畀伙食費用之外，又要應付學校嘅雜費開支，咁多年積蓄都用晒，之後咪問親戚借錢。𠵱家我哋買餸都係用住帛金，真係好擔心啲細路將來嘅生活費。」思緒紊亂的她輕輕抹乾眼淚續說：「𠵱家留喺屋企成日都諗番起以前嘅日子，希望可以快啲批到調遷，將來嘅生活到時再算，暫時淨係想好好睇住啲細路。」
早前阿妹在熟食小販檔做兼職侍應，每月賺取數百元，幫補家計。在她眼中，阿根是個體貼入微及照顧家庭的好丈夫及好爸爸，每晚她放工回來時，適逢其夫不用開工，他都會負責買餸及煮飯，待她回家後都可一起進食晚膳。數年前，夫婦習慣每逢早上必定會與兒子們一起進食早餐，才開始一日的工作，惟對於他們來說，此情景只能永遠成為追憶。
十二歲就讀中一的長子浩仔向記者表示十分掛念爸爸，他低聲地道：「爸爸好錫我哋，放工會同我哋捉棋；放假嘅時候，又會帶我哋去碼頭釣魚同埋行街，有時重會買啲文具畀我。」
蘋果日報慈善基金了解冼家三口的經濟困境後，即時從「殮葬專戶」撥款一萬元，助其殮葬亡夫，以解燃眉之急。
捐款編號：C0714
暖流熱線
電話：29908688
傳真：23702192
電郵：
網址：