上星期《信報》獨家爆料，話地鐵主席兼行政總裁蘇澤光辭職，因事出突然，各界無不感到錯愕，大家都問一句：真唔真㗎？
馬場沙圈仍然係好好嘅消息來源。上星期六與馬主N一齊落沙圈睇馬，馬就冇乜好睇咯，睇嚟睇去都搵唔到一隻winner，反而睇冧巴就有瞄頭。一位老友在沙圈對左丁山話：「你前日（十月十日）講跑馬買冧巴，攞二、五、八號好勁，今日你估得唔得呢？」左丁山唔係生神仙，事先唔知，事後就明，當日頭五場嘅獨贏號碼就係八、八、二、八、五，死未？有醒目仔一早買咗八號獨贏過關，所以第三場隻八號「汕頭之寶」本來係九十九倍，都竟然有巨額投注過關，最後只得二十六倍，跑第尾，唔怪得張基喺電視話：「此乃賽馬的悲哀。」
馬就唔贏嘞，不過馬主Y成班人在沙圈捧場，幾位都與官場有來往。其中馬主C話：「蘇澤光自己冇話辭職，佢亦冇對《信報》講辭職，因此邊個對記者講佢（蘇澤光）辭職，顯然別有用心，差不多係房協蘇慶和翻版。蘇慶和睇咗《星島日報》頭版報道先至知道自己辭職，結果就只能約滿離職。」馬主C的消息來源素來幾準繩，如果所言屬實，香港啲肥缺真係愈來愈政治化，都唔知邊個喺度玩嘢，我哋睇到嘅新聞，可能係有啲醒目人士精心策劃，選擇性放料嘅。與其花時間分析呢啲嘢，不如花時間分析贏馬冧巴好過。