港股重陽假後跟住美股勁升，恒指全日升370點，收報9336，成交突破80億元，盈富基金（2800）亦即時售罄，港股好耐都未試過咁醒神。美股勁升主要是市場憧憬美國企業盈利會有好表現，但香港仍是經濟不景、財赤驚人、聯滙風險上升、壞帳與破產個案未見頂及長期通縮，而最弊就是恐怖襲擊亦開始全球化並蔓延至亞洲，港股點可以持續跟美股上升呢？況且美國企業盈利表現是否好轉，仍有待觀望。
中移動（941）噚日突然炒回購，股價勁升7.7%，收報19.65元。市場傳聞中移動會回購10%股權，以中移動噚日市值3900億元計，回購10%，需斥資390億元，中移動邊有咁多錢呀？有就唔使搞一大輪，發行80億元人民幣債券集資啦。
麗星郵輪（678）停牌表示會供股，市場盛傳會50供7，每股供1.95元，集資近12億元買新郵輪。近期二三線股供股抽水都頗多，但就甚少見到有咁大型抽水活動，幸好本地散戶甚少投資此股，否則會影響散戶投資氣氛。
一直令散戶激心嘅電盈（008），唔知係咪因太多散戶唱「電訊盈fall」唱得太悲哀，噚日終於化悲憤為動力，全日勁升12.9%，重上1元水平，收報1.05元，成交1.4億元。據聞有人趁市況好轉大挾空倉，不過黑客話班淡友未驚過，因為手上重有大把貨等住要沽，如今股價挾高，更有利出貨。
御泰國際（155）噚日停牌，據聞再度獲大股東注入證券及融資業務，同時發行可換股債券畀大股東作為收購代價。上次御泰國際獲大股東注資後，鑊氣大盛，唔知今次又會唔會再大炒一轉呢？但 Cookie話，今時唔同往日，據聞有關方面暫時都唔會再開水喉。
阿虎