唔知大家有冇留意，梁錦松自從娶咗國寶級「插水皇后」伏明霞之後，一直冇好過，唔係頭耷耷，就係眼光光，上任初時嗰種意氣風發冇晒；而香港嘅樓市同股市，呢段日子就更加插水插到好得人驚！
接近政府極權威人士嘅極八卦友話，唔知係咪阿松同霞女命相唔夾，搞到財星黯然失色。於是八方去請教高人，命理學大師蘇民峰居然手指拗出唔拗入，幫住松嫂都唔幫阿松。蘇師傅一口咬定係阿松自己唔爭氣，與其內子無攸。佢重串串咁話：「條友做嘢唔掂就唔掂，唔關老婆事。一路都係政府對佢有期望，佢一上場我已經唔睇好啦！」
蘇師傅曰，阿松額闊下巴尖，係「思想格」，講就天下無敵，做就有心無力；呢類人絕對係師爺材料，遇着個有料又英明嘅老細則飛黃騰達，遇着董建華就只有衰上加衰！
咁霞女又點呢？蘇師一輪嘴咁話，「插水皇后」鼻直而長，顴骨有力，屬「行動格」；缺點係要面唔衰得，自信心不足，同「思想格」嘅阿松啱啱相輔相成，一定可以和洽相處。蘇師傅重話，只有額頭高顴骨凸嘅女人先會剋夫，霞女個相不知幾旺夫！
傳真︰2623-9278
電郵︰