剛過去嘅三日長假期，一輪汽車減價風潮，備受行內行外人士注目之餘，亞Mark亦看得目瞪口呆；除咗兩大汽車代理商，減價幅度驚人之外，最令人意想不到嘅，會係響咁淡靜嘅市道下，會有咁多人搶購嘛！亞Mark身邊有位會計師嘅朋友幫手一計，日產Prairie首批100部，加埋及後多畀一萬蚊加推嘅50部新車，全數售罄的話，今個年度可有多收接近2,300萬嘅進帳；然而，豐田以唔到14萬嘅車價，限售50部Picnic作招徠，以單日嘅周六計算，已收到200張入票及200萬（保證金一萬蚊）定金。
據知，截至今個星期一，豐田代理共收到接近700張入票，呢招以小博大嘅手法實屬高明，皆因佢哋Hold住班準買家，唔會買日產Prairie之餘，抽籤過後嘅向隅者，聽聞代理只會折讓一萬蚊畀佢哋購買Picnic，即係話班準買家要畀至少17萬8千，才可以擁有呢部炙手可熱嘅家庭七人MPV喇！想唔到呢招取材自香港地產商嘅賣樓奇招，響車行係可以活學活用㗎！真係問你服未？