一位讀者蔡先生來函，話明唔滿意無綫亞視唔播亞運比賽，好多市民對香港人攞金牌完全冇迴響。佢又話李麗珊得金牌翌日，《蘋果》頭條係「刀賊劫鳳樓」，裸體鳳姐實在礙眼。
讀者蔡，你都知㗎啦，香港媒體要講賣紙，講收視率，亞運並非世界體壇盛事，歷來香港人冇興趣睇，所以無綫亞視都完全冇興趣競投轉播權，只有有線體育台有興趣播映啫。冇收視率就冇廣告，無綫精到甩辮，點會睬亞運吖；至於亞視，限於財力與慣性收視率，亦唔會爭嘅。
你話「國際城市，香港不配！」講得好啱噃，我哋兩個英文台除咗動物、環境紀錄片之外，乜嘢都慳水慳力，最近更加話想加插其他語文嘅節目㖭，皆因英文台唔賺錢。香港六百七十萬人，人人都話想讀英文中學，視中文中學為次等，不願母語教學。咁樣好吖，點解唔聽英文台，學習英文呢？如果係真正嘅國際城市，所有家長都想子女入英中，搵幾十萬人睇英文台都得啩？香港係國際城市？宣傳啫。
鬼佬R以前曾經因為香港睇唔到欖球大賽，與幾位老友飛去新加坡住酒店睇波，每人連機票酒店飲食，用咗成萬銀，佢𠵱家好鬼𤷪夜晚睇電視冇嘢睇，左丁山都好同情佢！（另一位讀者Alex想知道如何訂閱《戰國策》月刊，茲再講一次電話號碼：2851-3281）