有無發覺我求大俠呢排三日唔埋就會提吓迪比亞路？鬼叫無論係祖雲達斯同埋意大利比賽，都靠佢擔大旗咩。好似禮拜三佢要幫意軍火併威爾斯，到禮拜六又要幫祖記硬撼國際米蘭，跟住下個禮拜中又要踢歐冠盃，真係戥佢辛苦，鐵人都會隨時暈低。
淨係睇吓同佢差唔多一齊開季班意甲大哥，好似國米韋利、AC米蘭恩沙基已經頂唔順要唞下，就知金童負荷幾大。我求大俠數過，由上個禮拜日對科木，計到下個禮拜三對紐卡素，金童十幾日內要踢五場波，最慘係最近呢幾場都係關鍵大戰，騎虎難下焗踢。
意大利今晚作客威爾斯，教練查柏東尼個飯碗保唔保得住，又係靠晒金童囉。
西布朗領隊美臣真係食完飯無嘢做，無啦啦走去剪番之前幾場對強隊嘅片，然後寄去英足總，話要反映球證偏幫強隊喎。計我求大俠話往事已矣，佢有時間不如展望將來，諗吓點樣可以改善隊波重好啦。
曼聯費爵爺性醜聞單嘢愈諗愈多疑點，連南非當局都決定唔起訴佢，睇怕都係老屈居多。不過自稱係受害者嘅妮迪亞就死唔斷氣，係都要透過民事訴訟索償。估計此姝係想博出位啫，查實佢一早就達到目的，收手罷啦。
上個禮拜英超無戰事，李鐵就走咗去蘇格蘭首都愛丁堡度假，呢位國足猛將講到明此行目的係減壓。鬼咩，愛華頓響嚟緊禮拜六硬拼阿仙奴，李鐵兄要同大名鼎鼎嘅韋拉響中場較量，充定電到係合理嘅。我求大俠精神上支持佢㗎。
英國太陽報早幾日拍到約基同佢前女友佐敦，帶埋佢哋嘅愛情結晶品一齊行街街，真係溫馨到痹。諗起約基早排重未肯認番個仔，唔知係咪因為最近響球會踢得幾好，加埋良心發現，終於肯盡番做男人嘅責任。希望呢對響慾海浮沉多年嘅蒲精，真係修心養性啦。