從外國引入嘅香薰，近年在港大行其道，但係原來香港都有生產呢類香料，而且歷史悠久。早喺十九世紀，荃灣半山嘅香木坊，出產一種香木，加工成為莞香粉後，賣畀歐洲同南洋嘅貴族，呢啲就係香薰嘅前身嘞。
蘭西噚日喺銅鑼灣地鐵站攞咗本免費嘅書仔嚟睇，先知到有呢段歷史。另外，原來荃灣半山嘅川龍，係豆腐作坊同釀酒坊嚟㗎。
講咗一大輪，大家可能覺得一頭霧水，原來呢本書仔係嘉里建設荃灣半山寶雲滙嘅宣傳刊物。裏面講咗好多荃灣嘅歷史同環境，講個樓盤嘅就只有幾頁。
講番寶雲滙，佢嘅英文名係Cliveden，原來係英國一個地方，以滙聚上乘雕塑、細心布置嘅人工園林、依傍青葱樹木同優美小河嘅英式花園見稱，嘉里話荃灣半山同呢度有得比。
寶雲滙上個禮拜開放示範單位以嚟，發展商落實出售12伙，普通單位呎價由2700到3750蚊，另兩個頂層連天台單位，呎價重差唔多4600蚊㖭。
政府為咗縮皮，將工作外判，但係業界就話因為競爭激烈，爭到都冇乜着數。
業內人士話，村屋同農地嘅地租同差餉估值，以前都係差餉物業估價署自己負責。
𠵱家外判出街嘅政府工程，即使蝕本，都有測量師行爭住嚟做，情況都幾慘淡。
假如攞唔到合約，測量行就蝕硬，如果爭到，起碼可以幫補燈油火蠟，蝕少啲，可望捱過寒冬。
示範單位大家就睇得多，不過，論創新，都算嘉華喺沙田宜家傢俬店內設置嘅嘉華星濤灣示範單位。
發展商有此創意，就係諗到市民一方面可逛家具店，可順道睇示範單位，一舉兩得。
嘉華早喺8月28日已經開放咗示範單位，聽講，個多月嚟有成十萬人參觀，重有兩萬人參加抽獎。
噚日發展商就安排28名得獎者去領獎，獎項係價值一千蚊嘅宜家傢俬禮券。
快餐食肆割喉競爭，三十幾蚊有東星斑片火鍋、賣開漢堡包嘅又賣埋飯盒，連便利店亦有10蚊飯盒賣。小市民當然開心，但商場大業主見到班租客鬥成咁，就心都實埋，因為旗下食肆舖租，主要靠抽取生意額的提成部份，租客減價減到邊際利潤都削埋，租金收益自然少咗一截。
港島甲級寫字樓租金下滑，十零蚊一呎嘅選擇愈嚟愈多，原因係供應多，需求弱。早前曾一度影響寫字樓市道嘅放頂租樓面，近排已經少咗，最矚目係高盛證券放頂租長江集團中心3層。蘭西聽聞，其實乙級寫字樓都有放頂租嘅情況，但涉及嘅樓面唔係好多，所以少人留意，例如灣仔霸田商業中心，截至9月，約有五千呎樓面放頂租。
聽講，有廣告公司將用緊嘅部份乙級寫字樓放頂租。業內人士話，呢類公司喺入伙時落本裝修得好前衞，搞到放頂租嘅時候，唔係咁易搵到客接手，所以成功放頂租嘅機會好微。
喺香港行街，好多時都會有人塞啲傳單畀你，大家嘅反應係望一望就揼落垃圾桶。蘭西最近喺佐敦收到啲內地樓盤單張，發覺佢哋好識宣傳之道。單張印咗好多優惠贈券，好似中山雅居樂咁，共有5種優惠，由纖體、運動服裝到飲食都有。中山嘅星晨花園，就送睇樓團現金贈券，不過就要參觀佢個盤至用得。
啲單張有咁多優惠，想要享用就一定要keep住佢，點都會順便睇埋發展商個盤啲簡介，咁就收到宣傳效果。
蘭西
電郵地址：