羅文前晚約十一時因呼吸困難，緊急送往瑪麗醫院，急救四十五分鐘後情況穩定，轉送病房留醫。據知羅文近日甚少進食導致血糖過低，要靠輸血和吊葡萄糖保持體力，現時體重只得約六十磅。其愛徒容祖兒聞訊後，昨晨從台灣趕返港探羅文，逗留三小時後隨即返台。
身患肝癌的羅文（籮記）前晚再度入院，這是他自今年五月以來第四度留醫。籮記前晚約十一時左右，因血糖和血壓過低導致呼吸困難，在助手阿東和籮記的胞姊和胞妹陪同下，由救護車送往瑪麗醫院急症室搶救，近百記者聞訊趕赴醫院。
至晚上約十一時四十五分，籮記渡過危險期，由急症室轉送二十一樓病房，籮記喝水後已可以說話，不過聲線較微弱。據知籮記今次病情告急，與他近日食量極少有關，體重跌至六十多磅的籮記，前晚送抵醫院後要即時吊葡萄糖水。
昨日下午約六時許，籮記的助手阿東出外購物後返回醫院，阿東說：「籮記冇乜嘢，瞓咗覺，只係個人瘦咗啲，佢𠵱家只可以食流質嘢。噚晚call白車係因為籮記血壓低咗，為安全起見先至送院，𠵱家觀察緊，未知幾時可以出院。」
阿東其後又指摘說：「有啲周刊嘅標題起到好誇張，講到佢好似好嚴重咁，你哋噚晚影相嘅時候，撞到籮記床邊嘅量度器都爆咗，真係好離譜，重爭啲撞到佢，如果真係撞到籮記，咁點算呢？」
而籮記的徒弟容祖兒，本正在台灣宣傳，但她一得知籮記前晚入院的事，即放下手邊工作乘早機返港探望，關切之情盡現。容祖兒於昨早九時半抵達瑪麗醫院，逗留三小時至十二時半才離開，她說：「我去咗台灣做宣傳，今朝為咗返嚟，取消咗一個電視台訪問，跟住就要坐三點鐘機返台灣。之後我要到二十九號先至返，中間會唔會再返嚟，就要睇情況。」
問容祖兒今次返港探望籮記是否公司安排時，她說：「係我自己想返，我頭先同籮記有傾偈，佢亦知道我嚟咗。」容祖兒還透露籮記一直需要戴氧氣罩幫助呼吸。
而籮記前晚入院後，不少好友都即時趕往探望，其中包括楊受成、英皇三T小花、Twins、鄭伊健、林珊珊、林夕、黎明的契媽小菁、籮記前助手Terry及張徹太太等。小菁離開醫院時透露說：「籮記一直清醒，佢今次只係有啲唔舒服先至入院，佢有輸血同埋吊葡萄糖，𠵱家留院觀察，可以食返流質嘢。」外傳籮記前晚一度停止心跳，小菁即否認有此事。而林珊珊則說：「籮記冇事。」
昨日清早謝君豪亦曾到醫院探望，下午約三時許，成龍、楊受成、陳自強和英皇高層吳雨齊往探籮記，但眾人只逗留了五分鐘便離開，記者向他們詢問籮記的情況時，四人都不肯回答，成龍只向記者說：「小心啲，唔好撞到人。」
此外，前晚採訪期間，曾發生醫院保安與記者爭執事件，最後要報警辦理。期間籮記前助手Terry勸交時，一度激動至滿面通紅。
而籮記的助手阿東因護主心切，昨晨約六時向記者透露籮記剛入睡，隨即他又向記者大叫了三聲「好鬼賤格」，指摘傳媒採訪時引起的混亂，對籮記造成影響。
採訪：楊潔雯、王崇穎、駱華齡
攝影：陳志嵐、娛樂突發組