$2.5籠點心，$10碗粉麵，$8隻片皮鴨，一家四口一日食飽飽，無取巧！
今日就趁李家四口得閒，齊齊去將軍澳沿線三個地鐵站附近食店食足三餐，事後計番條數，明碼實價盛惠$104，而且餸菜的質同量都無將價就貨，值得鄭重推介！
記者：陳冰麗
攝影：陳盛臣、黃子偉
早餐 寶琳站
為方便起見，精明的李太決定先由寶琳總站埋手，再順地鐵站落九龍方向繼續前進搵平嘢食。平日一家至少一星期例必歎一次早茶，來到酒樓眾多的新都城一至三期，詠賢及詠彤就最雀躍，因為飲完早茶，重可以到附近二期的戲院睇場戲。經李太格盡其他酒家價格後，最終選擇了新都城一期的運通海鮮酒家，裏面賣的點心最為抵食，特價$2.5，雖然只限四款選擇，但正所謂貴精不貴多，李太就選擇了其中三款一試，發覺質素及份量並沒有因為價錢平而偷工減料，而且保持水準。
運通海鮮酒家的$2.5一籠點心可說是全新都城內最抵食的一間，特價點心四款分別有龍皇大包、碧綠帶子餃、梅子蒸排骨及家鄉鯪魚肉豬爽肚。龍皇大包非浪得虛名，一個有直徑3吋，比如一個細少少的漢堡包，餡料足，內有蝦肉、肉碎及雜菜等。碧綠帶子餃則釀有帶子肉、蝦、西芹、甘笋，食落爽口清甜。用梅子蒸熟的排骨，酸甜惹味，排骨亦夠腍滑。
李太一家唔夠飽，決定叫多個盅頭飯，原來運通除了盅頭飯（鳳爪排骨、臘味、鹹魚肉餅等）做特價，瑤柱蝦米腸、金牌粥（柴魚花生、皮蛋瘦肉、菜乾豬骨、鯪魚肉等）亦只是每樣$3.8，據老闆羅先生講，因為反應好，所以繼續推出，平均每日賣500碟。詠賢因為鍾意食鳳爪，所以就選三寶中其中一個的鳳爪排骨飯，一來飯夠飽肚。詠賢就食其中的鳳爪，而飯及排骨則由爸爸及媽媽share食。
店名：運通海鮮酒家
地址：寶琳新都城一期商場二樓208號舖
電話：26234889
營業時間：7:00am-12:00am
座位：約850個
付款方法：現金及信用卡（Visa或Master）
註：只限堂食，特價點心優惠時間早上7時至下午5時，早茶三寶只限上午7時至10時半，兩者優惠於星期六、日及假期除外。
午餐 坑口站
坑口站位於東港城及南豐廣場之間，食店林立，李太透過住在坑口村的朋友介紹，來到呢個較有特色食肆的坑口村。這裏以小炒及茶餐廳居多。行勻坑口村大部份食肆，終於被她發現一間不大起眼但就相當抵食的食肆叫坑口小食。
表面上店內裏賣的是一些大路的車仔麵，但經李太一家試過，發覺不單價錢平，而且食味並不簡單，部份食品重係老闆許生自家製造，絕無將貨就價，其中包括十蚊碗粉麵的配料鯪魚球、雲吞，而這裏的貢丸、牛丸、墨丸等亦比其他舖頭大粒，全因為老闆親自挑選過至入貨。平之外重可以任意揀選逾七種配料（鯪魚球、雲吞、貢丸、牛丸、墨丸、魚皮餃等）。平時一個出前一丁麵都要兩個零，但許生話不計成本，改出前一丁麵或辛辣麵都只係另加$2。
店名：坑口小食
地址：坑口村6B地下(牌方第二排)
電話：27196863
營業時間：10:30am-3:00am
座位：約30個
付款方法：只收現金
註：只限堂食，外賣則要另加$1。
晚餐 調景嶺站
經濟不景，好多酒家食肆以推出$1特價菜作為招數，但可想像到$1價其份量多極有限，人多的話根本無可能食得飽。位於調景嶺站附近的彩明海鮮酒家最近推出的$8隻鴨，大大隻，份量十足，每隻有四斤零重，足夠十人食都無問題。即使兩個人都可以Order一隻，而且跟鴨送埋皮、大葱及甜醬，毋須另加收費，絕無取巧，食客大可放心。
見到大大隻的片皮鴨做Promote，李太四口目標一致，即時異口同聲決定來隻片皮鴨作為今日的晚餐，詠賢同詠彤重好豪爽話由她們倆負責今餐費用，果然識做。
片皮鴨是這裏的五大皇牌之一，其餘重有大閘蟹、羊腩煲、玉環瑤柱甫，同是$8優惠價，至於東星斑亦只是每両$4.8。大閘蟹每隻大約4両重左右，質素亦相當不俗，蒸熟可見蟹膏豐滿，兩人的話可揀選一隻試。
店名：彩明海鮮酒家
地址：調景嶺彩明商場3樓307室
電話：23983229
營業時間：6:30am-12:00am
座位：約750個
付款方法：現金及信用卡（Visa或Master)
註：八位以下可選取片皮鴨、大閘蟹、羊腩煲、玉環瑤柱甫或東星斑，叫兩樣餸則須另加$40，只在下午5:30至午夜12:00供應，若九人或以上則可選多一款，惟不能帶走或外賣。
後記
回想起八年前初踏足將軍澳仍是一個寸草不生、荒涼而又交通不便的情景時，李太即時有這樣反應：
「嘩！乜咁似去咗荒山野嶺嘅。」
之後提到入將軍澳李太即耍手擰頭，重話咪預佢。八月將軍澳地鐵新支線通車後，李太重臨將軍澳，卻有另一新睇法：
「人多車多，連樓都零舍密集，寶琳站嘅新都城就最旺，酒樓多嘢食又平，重有個大型購物商場可以shopping。下星期我哋都諗住嚟多次。」