謝霆鋒被控串謀妨礙司法公正案今日判刑，亞視會喺今個月二十九號推出一個新節目《全民大測試》，為咗打響頭炮，亞視乘機以霆鋒嘅判刑做話題吸引觀眾，呢個節目會由朱慧珊同黃子雄主持。
馮仁昭知道今日亞視會播出《全》嘅宣傳片段，其中會有一個民意調查，題目係「你認為謝霆鋒的判刑是？」，而答案有A.過重B.過輕C.適中，觀眾可以透過電話揀答案。
噚日亞視喺總台召開記者會時，特別搵咗個男仔着霆鋒上庭時嘅裝朿，黑色西裝、黑超同揸住罐可樂，最慘就係要俾主持人用手銬扣住，似乎有啲諷刺兼過火！霆鋒今日接受完法庭宣判後，又要俾廣大市民公審，亞視真係好帶挈。
朱慧珊噚日話：「用佢宣傳無可厚非，但最緊要我哋唔係嘲笑佢同嘩眾取寵，只係關心時事，好多人都會發生呢啲事，只不過佢係藝人，我諗佢屋企人睇完個節目都明白。」
王力宏噚日喺中環舉行佢新專輯嘅記者會，邀請咗盧巧音做嘉賓。雖然王力宏因為飛機延遲導致佢遲咗成一粒鐘先到場，但佢嘅歌迷依然好有心，重送咗王力宏偶像StevieWonder嘅珍貴黑膠唱片，令佢非常感動。
王力宏𠵱家所屬嘅新力唱片買埋佢以前喺舊唱片公司嘅舊歌版權，幫佢出精選碟。而對於王菲加盟新力，佢覺得好開心，亦都想同王菲合作，不過，佢就冇聽聞新力以六千萬簽王菲四十首歌嘅條件。
靚女天后近年花好多時間搞海外市場，忽略咗香港。而平胸天后又冇心戀戰，於是姑婆就乘機攝位，加上公司人手變動，佢為咗一嘗做最受歡迎女歌手滋味，就畀壓力舊老細同新高層，話邊個幫佢爭個獎番嚟，就幫邊個。
問題係靚女天后都唔係蠢人，佢都同公司開出條件，有獎就留低，結果新高層衡量過，靚女天后價值點都高過姑婆，公司就決定幫靚女天后爭獎，睇怕姑婆想升格做天后，都重未係時候。
前晚二人女子組合2R去咗九龍灣展貿欣賞「BandFree2LiveBandShow」，佢哋兩個重好乖咁帶埋媽咪一齊去。不過，當記者想影相時，唔知伯母係咪唔慣有咁多人影相，佢好驚咁就行開咗。後來，2R都好大方咁捉埋媽咪一齊影合照，佢哋身邊重有一個鬼鬼哋嘅男性朋友同行。
黃百鳴、陳欣健等一班電影人昨往北京，同當地電影局官員傾吓呢行發展。問到黃百鳴旗下藝人王嘉明同人氣組合Cookies成員Theresa拍拖，黃百鳴話：「邊有咁快，而且後生仔女拍拖好平常。」佢又將Cookies同以前少女組比較，指少女組除咗羅美薇之外，個個都好百厭，有人食煙、有人遲到，𠵱家Cookies就乖好多。