六十五歲任職大廈管理員的歐陽瑛老伯，因為子女相繼失業，需獨力支撐一家人的生活。沉重的財政及工作壓力，令他喘不過氣來，最終走上自殺絕路。可憐歐陽伯舉殯在即，老伴梅婆婆和三名子女，連殮葬費也無法籌足，蘋果日報慈善基金即時撥款助歐陽家支付一筆殮葬費。
「成世人都要憂呢樣，愁嗰樣，畀個『錢』字累死佢。」一朝痛失老伴，本已瘦骨嶙峋的梅婆婆，神情顯得更加落寞。
白髮斑斑的歐陽伯，老來不但未能安享晚年，還要為三餐一宿而擔憂。歐陽夫婦雖育有三個兒女現四十至四十二歲，惟長子已婚遷出，自有家庭負擔；次女及幼子又相繼失業；歐陽伯遂成為一家經濟支柱。長子阿強慨歎：「我每次見親老竇，佢都係愁眉苦臉，成日話冇錢，搞唔掂，份工又做得唔開心；我自己冇本事幫佢，惟有叫佢見步行步，點知老竇會咁儍。」歐陽伯疑不堪生活壓力，日前在家中吊頸尋死，結束了他煩惱的一生。
兩眼通紅的梅婆婆表示：「我全副身家得番二十四蚊，𠵱家佢兩腳一伸，我哋連佢嘅身後事都冇錢搞。」
梅婆婆稱，自從有病的次女及任職速遞的幼子相繼被裁員後，近年家中的經濟重擔便落在丈夫一人身上。
然而，歐陽伯今年亦受減薪潮影響，月入由九千元削減至六千五百元，且因舊區清拆而被迫遷往新落成的公屋，租金由四百多元大幅飆升至二千多元，再扣除各項雜費開支後，三餐亦難於應付，經常要借貸度日。
「老實講，呢一年嚟，阿瑛未試過畀多過五百蚊我做家用，有時一個星期先畀得一、二百我買餸，要好慳好慳；但我從來冇怪佢，我知道佢都唔想，佢自己都冇錢，惟有呢度借啲，嗰度借啲囉。」梅婆婆幽幽地說，日後的生活也不敢想像，稍後或要考慮申領綜援金，但燃眉之急是先要解決丈夫的殮葬費問題。
任職餐廳侍應生的阿強亦歎道：「屋企搞成咁，我都好傷心，好想老竇盡快入土為安，但我自己環境都唔好，成日冇工開，又有一頭家，真係有心冇力，幫唔到幾多。」
蘋果日報慈善基金了解過歐陽家的苦況，遂即時從「殮葬專戶」撥款二萬元，助梅婆婆辦理亡夫後事及應付短暫生活費。
捐款編號：C0715
暖流熱線
電話：29908688
傳真：23702192
電郵：
網址：