早排流行過一輪炒高息工業股，但目前除咗幾間公司股價仍然企硬之外，其他都被勁質，皆因芬佬鍾意你時就捧到你上天，唔鍾意時就即刻沽貨走人，完全冇情講。
好似小初一度鍾情過嘅建溢集團（638），上星期股價由1.80元水平被質落至最低1.20元，噚日港股大反彈，隻股回升5.4％，收市報1.36元。但經紀陳話，據聞基金仍然未沽完貨，反彈未必會長久。
經紀陳解釋，建溢股價1年內由1元升至最高2.85元，主要因為芬佬見藍籌股唔掂，所以向有息派嘅工業股埋手，其間建溢雖然並無趁勢批股，但大股東同一些董事，就趁機行使認股權，並沽貨獲利。
由於建溢貨源較之前分散，加上供應又多咗，結果芬佬一話唔玩，股價幾乎完全冇承接力急跌，雖然大市好轉，建溢股價短期內或再有反彈，但基於芬佬已離場，好難望佢重上高位。
經紀陳重話，實情帶頭沽貨者，係早幾個月前大力唱好嘅一間外資行。
慕容小初