都話打得又睇得嘅靚女唔易做啦！我大口羅拉不嬲都有追開以前無綫播嗰套卡通片《皇家雙妹嘜》，兩位女主角又爬牆又擒車，所以當我知道今季日劇有真人版睇，就好懷疑可唔可以拍得好似原著咁誇張搞笑。
一睇見套劇由兩位新紮女星伊東美咲同原沙知繪做，我就諗：「唓！咪又係嗰啲花拳繡腿！」不過唔睇猶自可，一睇美咲妹同阿沙，真係好鬼搏命，着住套短裙仔女警制服起飛腳兼凌空批踭，完全冇話就位，就算喺香閨踢沙包一樣有睇頭，睇到我鬼咁肉緊。前幾日美咲妹同阿沙接受訪問，周身瘀嘅阿沙話：「我哋日夜都要練習，keep住身體柔軟度。」不過為咗套戲冇計啦！
除咗有靚女睇，第一集重有世界飛魚科比客串，佢扮一個路不拾遺嘅外國遊客，同雙妹嘜雞同鴨講，拍完之後科比重講笑咁話：「我諗導演趕住收工，所以一takeOK啩！」