揀選生日禮物給朋友是一件天大的難事。首先需要確定「朋友」的定義，朋友一定不只等於認識的人。要買生日禮物給只是認識的人，那很簡單，求其找一份自己喜歡而又合乎預算的禮物，認識的人收到覺得開心自然最好，否則也沒有大所謂。為何唔乾脆慳番算數？那也不行，那是人情世故的關係，有時認識的人會邀請你去生日派對，其實可能對認識的人的生日並不熱衷，但內心深處着實想趁機派對一番，於是乎一份小禮物便成為入場費，玩起來也覺心安理得得多。
買禮物送給朋友則完全是兩碼事，當朋友拆開花紙看見禮物的那一剎那，很容易會捕捉到他?她是真開心或是假高興，若然朋友真的很喜歡那份禮物，自己會有雙倍的開心。
忌買家居擺設，除非閣下百分百了解朋友家中的實況，又對其品味瞭如指掌，否則送擺設是險中險。細細件嘅唔啱心水最多放入櫃桶，冇眼屎，乾淨盲，但若果係啲大大件嘅畫連框、大枱燈、懶cute嘅大公仔又或者枱枱櫈櫈的話，既唔鍾意又唔知點安置，屋企經已細，重要放無謂嘢，唔得你死！
頗喜歡送一些衣服以外的配套給朋友，例如帽、手襪、頸巾，選擇方面係有咁姣買咁姣，男女一樣，黑、白、藍、灰等穩陣色，要買自己會買，反而啲粉紅、粉紫，如果唔係有人送真係冇藉口着。再者，見到好朋友男人老八着到成身粉紅姣騰騰咁，確係施比受更開心。