左丁山呢日早上碌落床，急急梳洗出門，𨋢門打開，裏面竟然有一位西裝友企喺度，俾佢嚇咗一跳。乜有人咁早返工，同左丁山鬥早？太陽重未完全走出東邊嘅山峯噃？
走入𨋢內，當然禮貌上要叫早晨，西裝友報之以微笑，近距離睇真啲，佢好似某位高官喎，以前叫做首席助理局長，𠵱家叫副秘書長？總之佢係某大政策局嘅高層之一，左丁山對佢講：「咁早返總部，早唔早啲？」高官笑一笑：「搵食艱難。」一出𨋢，佢就飛奔出門趕上頭班小巴，左丁山就上的士，自覺自己比做官更幸福。
晏晝同某位部門負責人講起，經佢提醒：「唉，今日係特首上立法會答問，高官梗係要碌返政府總部做最後部署，幫局長手，最後打點啲模擬Q&A，畀特首辦處理啦！」原來如此，唔怪得以前從未在𨋢中見到高官。
高官話「搵食艱難」，基本上冇錯，愈高級嘅愈辛苦，所以佢哋對一啲公帑津貼嘅機構，成日想斬津貼，三位高官對左丁山話過：「某大學啲職員五點零就放咗工，我哋就做到七點八點，即係話大學有脂肪，可以壓縮一啲啦！」咦，咁嘅觀察，似乎好新鮮，大家五點零放工，別人看在眼裏，另有解釋㗎。左丁山以前一位老闆巡視辦公室，見到打字員織冷衫，就吩咐左丁山即炒一兩件，佢話人多冇嘢做喎。唉，啲寫稿佬、大記者歎晒慢板，到死線都冇稿交，打字妹唔敢放工，死守，咪織吓冷衫囉，點知解釋無謂，要執包袱鬆人。