新世界中國珠海金灣區珠海新世界海濱花園，今個月開始交樓，本周日搞收樓團，重喺現樓安排家具同電器商駐場，等首批業主可以順便買埋，唔使四圍搵咁煩。
香港地產商用過業主推介親友買樓有錢收呢招，𠵱家呢個盤都用上，而且出手重好多。凡舊業主推介朋友認購單位，可以獲送三千蚊人民幣。聽落好似冇香港送一萬蚊咁多，點會係重手呢？以個盤嘅單位售價由十六萬幾起計，三千蚊就差唔多等於樓價兩巴仙。比起香港二百萬至得一萬，係咪重手啲呢？
個盤佔地三百六十萬方呎，第一期有十一座七層高住宅，由兩房831呎至五房1463呎。發展商重可以為買家提供直系親屬遷戶優惠，每人辦理遷戶，手續費只係二十幾蚊，就可以攞到珠海特區戶籍。
太古地產鰂魚涌住宅項目逸樺園，建築進度如火如荼，蘭西最近經過，見到有啲低層單位已經裝埋窗同環保露台，但理論上樓盤重有排起，而發展商又冇理由會喺現樓搞示範單位，點解會有幾個起好嘅單位咁奇怪？
打探之下，原來發展商用咗呢啲單位做辦房，即係將幢大廈要用嘅裝修材料，好似雲石、地板等樣辦擺晒喺個單位度，咁就可以監察住啲料係咪同原先訂嘅相同，一發覺有唔妥，就即時更換。
其實每個樓盤都會撥出一啲地方嚟做辦房，有啲盤會設喺會所度，所以大家唔多覺。第日行過見到起緊嘅新盤有啲單位好似搞掂晒咁款，大家就唔使「𢱑晒頭」。
曾揚言跨區截擊九龍倉深井碧堤半島嘅長江實業，喺深井碧堤半島開放示範單位畀小記參觀當日，派出置業精英踩場，更講明會喺區內租用舖位，開設分行兜客。
然而，碧堤半島經過數星期熱賣，進入最後煞科階段，但置業精英無晒影，而市傳將開分行嘅舖位，喺碧堤開售期間一直以木板圍住。噚日蘭西見到間舖開張，竟然係一間藥店。到底長實係乜嘢葫蘆賣乜嘢藥？
噚日係重陽節，孝子賢孫上山掃墓，有些會焚燒造型維肖維妙嘅紙紮品供奉先人，令蘭西諗起某次番內地睇樓嘅經驗。話說參觀過一個裝修好靚嘅示範單位，但係感覺上總係怪怪哋，原來影音電器都係用紙造㗎，超薄電視、四件頭HIFI、個人電腦等，與美輪美奐嘅示範單位格格不入。
不過，從經濟角度出發，紙盒電器造價相宜，損耗度低，又唔會浪費電力，又無幅射，更唔怕畀人偷。發展商為咗慳錢，都幾有諗頭㗎。
𠵱家雖然話係買家嘅天下，但若果個盤夠筍，買家都要爭餐死先買到㗎。美聯物業沙田銀禧分行經理招錦昌對蘭西講，穗禾苑G座高層5室銀主盤，開價115萬元，即刻有5個同屋苑買家爭住買，最後由屋苑租客以120.5萬元買咗，比銀主開價高5.5萬。不過，以單位面積703呎計，呎價都只係1714蚊，仍然比市價平一成六，唔怪得放盤一日就賣咗啦。
穗禾苑嘅放盤，以四百幾同五百幾呎單位為主，七百幾呎嘅就較少，所以啲筍盤有好多換樓客吼到實。
上海最近搞咗個「2002年上海名牌地產商推廣會」，選出九大名牌地產商，上海復地榜上有名。復地以物業銷售代理起家，然後進軍地產發展，差唔多十年間，變成全上海最大嘅民營企業。
上海復地係上海復星集團嘅地產業務旗艦公司，舊年銷售面積，係上海十大地產商中排名第六，不過前五名全部都係國營企業。
「起樓質量要好，品牌放在首位，要清楚市場目標同建樓周期要快。」呢啲都係上海復地認為係發展地產嘅致勝之道。
該集團今年將推售七千幾個單位，上半年賣咗三千個，套現約十億元。興建中嘅樓面近千四萬呎。
上海復地計劃來港上市，原本諗住今個月展開上市路演，可能有見近排民企股接連出現醜聞，所以將日期押後至下個月。
銀行為咗促銷銀主盤，都要搞搞新意思。蘭西聽業內人士講，有啲銀行會以發展商慣用嘅跳bar制，做到某個數量嘅單位，就可以收多啲佣。有啲會限定某段時間，做到最多嘅代理重可以有獎金。
有啲銀行就費事煩，實行一次過加佣，等代理唔會淨係掛住做一手盤。
蘭西
電郵地址：