經過採訪世界盃，加埋今次亞運會，近四個月來小記足足有超過兩個月時間喺南韓呢邊，餐餐泡菜送飯，飲食習慣已變成一個地道南韓佬。唉！終於到最後一日，呢兩次南韓之旅所見所聞，睇嚟未來十年，小記都冇乜必要再去南韓旅行啩。
講番閉幕禮，保安工作就冇開幕禮咁嚴，記者可以自由喺草地上同運動員影相；突破上屆成績嘅香港隊當然心情極靚，代表團人人都玩到癲晒，就算平時斯斯文文嘅團長許晉奎都唔例外，最慘就係持旗手李暉，因為佢要企喺大會安排嘅指定位置，足足大半個鐘要企喺度冇得郁，眼見成班隊友玩又冇自己份，不過李暉係太極好手，定力好當然冇咁易悶親。
小記喺閉幕禮前，收到風門票只賣出五成，不過現場所見，就超過九成觀眾，唔知大會係唔係又好似其他比賽一樣，派飛畀附近的居民睇免費騷呢？