施明的一對孖仔，其大孖李泳漢早前曾揚言用天眼通睇到Twins成員鍾欣桐（阿嬌）係佢前世嘅老婆，令人莫名其妙，佢噚日喺馬鞍山出席仁濟醫院籌款活動時繼續借阿嬌宣傳博出位，力讚阿嬌靚女之餘重話想娶阿嬌做老婆。
為咗追阿嬌，李泳漢重寫定劇本搵人投資開套戲畀阿嬌拍，重話價錢任阿嬌開，實行一廂情願話搵阿嬌做女主角，自己就做男主角喎。
但李泳漢原來從未真正接觸過阿嬌，佢話：「雖然未見過，但隨緣啦，要做嘅都做晒，劇本又寫埋，鍾意佢唔係因為佢靚，我對佢有一種好特別嘅感覺，我已經同佢公司接觸過，佢哋話要睇吓劇本先再講。」
借開戲嚟追阿嬌，條橋老唔老套啲呀！不過李泳漢重好厚面皮咁話：「我唔會理人哋點講，最緊要阿嬌冇咁諗，同埋佢肯接受我。」咁肉麻嘅嘢都講得出，真難頂。
英皇新人三T小花之一嘅蔣雅文（Mandy）早幾日喺跑馬地，一嘗全港首部流動髮型屋洗頭吹頭嘅滋味。
由於髮型屋係開放式，Mandy喺車上洗頭吹頭，十分矚目。問到Mandy喺車上洗頭嘅感覺？Mandy話：「真係新奇、刺激、又好玩。我都係第一次喺車度洗頭，又俾條街啲人望住，都幾矚目㗎。」
Mandy重話對自己嘅秀髮十分滿意，佢話：「我啲頭髮似媽咪，又幼又密，平時我都會好好打理啲頭髮，盡可能唔染髮同埋唔用風筒吹頭，兩樣都好傷頭髮㗎。」
外形似足鬼仔嘅靚仔男星，佢呢兩年拍嘅戲，做奸角都做得幾出色，但鬼仔冇乜運氣，好少少又沉番落嚟，基本上佢都係坐多過做，所以鬼仔成日走去蒲吧𠝹女。以佢嘅外形，𠝹女就梗係唔難啦，佢一時講吓唐話、一時又講吓英文，雙語廣播，有時發音又歪歪哋，𠱁到啲女仔唔知幾咁開心，而佢通常都會同啲女仔講：「你like唔like我啫？」呢句就係佢嘅𠝹女口頭禪。
排骨女星為咗討好富商男友，佢竟然同富商男友講，話之前佢同一個男明星拍過拖，但因為識咗富商，發覺自己最愛都係富商，所以先會同個男星分手。
但真正嘅版本當然唔係咁，查實係佢大姐一直想飛黃騰達，要有樓有車，但佢同圈中人拍拖，當然好難滿足到佢嘅慾望，所以佢一直千方百計要識富豪，其實圈中亦有唔少嘅男星追過佢，但佢揀對象以銀紙作標準，又點會睇得上眼。
容祖兒（Joey）十一號喺台灣推出咗第二隻專輯《一個人的情歌》，由於佢出第一隻國語碟時嘅成績好勁，所以台灣嘅唱片商更加封咗佢為「10月份唱片行詢問度最高的女歌手」。而亞洲唱片方面嘅代表李素珠噚日重喺記者會上，送咗「護嗓六寶」畀祖兒，希望佢可以養好把聲。
唐文龍趁噚日重陽節，帶埋女朋友去到山頂登高兼拍拖，點知撞啱大班記者喺附近採訪，記者見到佢兩個即時追住影相，唐文龍起初拋低女友自己走咗去，佢女朋友就走得好慢，因為佢隻腳受咗傷，要用枴杖行路，後來文龍又走番轉頭扶住女友，重同記者講話：「佢隻腳扭親，影完就算啦。」