新一輪歐洲國家盃外圍賽喺周三又開波，不過廣大球迷想睇勢均力敵賽事，就要去酒吧先至得嘞﹗
點解？收費台禮拜四凌晨依然直播英格蘭賽事，以香港咁多碧咸同奧雲擁躉，播英格蘭都無可厚非，之不過今場對手係歐洲「魚腩」之一馬其頓。照形勢睇，英格蘭就肯定贏梗，場波亦會一面倒兼可能有好多入球，但係班球星又要幫球會踢英超聯同歐冠盃關係，我大俠就擔心英格蘭數入兩、三球之後歎慢版等完場，搞到球迷無晒癮。
其實，同日荷蘭作客奧地利同愛爾蘭迎戰瑞士，泰星都有得播，即係話如果你唔想睇英格蘭食魚腩，就要捱眼瞓落吧喇；不過全日重頭戲係威爾斯對意大利，意軍重召埋馬卡朗尼加強攻力，但居然冇電視台播，認真嘥料囉！
法國後衞文迪今季以借用身份加盟保頓，不過法國二十一歲以下國家隊教練杜文尼治就唔係好認同佢呢個決定，重踩保頓係「宇宙中嘅雜種」（axxholeoftheuniverse）㖭，認真出言不遜！雖則有佐卡夫壓陣嘅保頓唔係咩大球會，阿杜生你都唔使鬧人鬧得咁過份啩，口舌招尤就係呢啲喇！
新特蘭換咗韋健遜做領隊當然希望轉一轉運，點知球隊二號門將米列係日前幫挪威打國際賽時受傷，唔知休息幾耐，連埋正選門將蘇連遜手踭脫臼，搞到今個禮拜六要用諗住放棄嘅三號龍門馬曹對韋斯咸。我求大俠建議，不如好似卡迪夫千禧球場咁，搵個風水師傅睇吓好噃！
係人都知前法國球星簡東拿退休後好有興趣係電影業發展，最近「大帝」就接咗個擔任肥佬警長角色，為咗達到導演要求佢增磅，決定暴飲暴食，搞到個胃唔多妥，又因為貼人造皮而皮膚敏感，認真大犧牲。我求大俠呼籲各位香港大導演，如果開拍「瘦身男女」續集，不妨考慮吓佢！
有麝自然香，呢期英超霸主阿仙奴，響出年夏天就會同波衫贊助商「一剔」約滿，最近就有傳「一剔」希望繼續贊助呢支聯賽一哥球隊，新合約重會高達一億英鎊（超過十二億港元）！另外「三間」及英國老牌子「菱形」亦都蠢蠢欲動，總之阿仙奴嚟緊又會多一大嚿錢使，領隊雲格又可以簽多幾件猛將喇。