美股呢兩三個月都好大波動，大上大落，上周三杜指同納指分別創下5年同6年以來新低後，連續兩日由低位大幅反彈，市場氣氛原本極淡兩日內竟然有180度轉變。
美國的經濟數據未有帶來好消息，消費信心指數和零售銷售指數都比預期差，反彈動力來自IBM和通用電氣兩大公司對收益前景的樂觀展望，但最主要的原因仍是美股跌得太急太超賣了。
由7月中開始，美股有一次中期升市和跌市，上落都千幾點。7、8月的升市，杜指由7533升到9077，共升1544點；之後由9077跌到上周三的低位7197，更大跌1880點；跟住又勁彈兩日，杜指分別飆升247點同317點，上番7850水平，由低位起計，急升653點。
美股在連跌6周後，上周才扭轉頹勢，反彈4.3%，納指亦重上1200點水平，有6.2%進帳，但美股是否轉勢，言之尚早，暫時只可視為跌市超賣後的技術性反彈，初步目標可重上8000點之上，能否再升，要視乎經濟數據表現及企業對盈利前景展望而定，當然，美伊可能開戰的因素亦要考慮。
港股能否跟隨美股大幅反彈？一定程度要睇市場對亞洲版「911」嘅反應。無疑現時港股明顯由淡勢主導，投資者冇晒信心，但循環低潮若已出現，大市就會反彈，投資者心死亦往往是大市到底之時，今次相信亦唔會例外。
假後復市，恒指可重上九千關，上周四低位8772，極有可能係今次中期跌市的底位，大市在未來的一兩個月內，會開展一次升市（同美股一樣，暫時仍以反彈視之）。
估計恒指初步可重上10日線之上（上周五為9022點），然後再向20日線（9211點）和前周（10月2日）的高位9242水平推進。較樂觀的估計，恒指可反彈前一個跌浪（由12021跌到8772，共下跌3249點）的0.382，即目標為10013點。反彈完成後，大市會再尋底，屆時9000點水平支持力會再受多一次考驗。
今次博反彈，可選跌幅較大的藍籌和三四線實力股，和黃（013）、新地（016）和中移動（941）應有較大作為。
郭兆誠