上禮拜五美股狂升，兩日夾埋杜指有564點進帳，就算昨晚有啲回吐，重陽假後嘅港股點都會跟番多少，反彈得似模似樣。
港股如果高開二三百點以上，則高追Call輪會有風險。峇里恐怖事件，昨日令印尼股市幾乎冇咗1成，比較近印尼嘅股市，例如星馬菲，3地冇乜因為上禮拜五美股急升而得益。提防恐怖活動遲吓對全球股市有影響。
恒指如果唔係升得太急，博些少藍籌Call輪，例如長實Call輪9517，和黃Call輪9518、新地Call輪9525、太ACall輪9475。做法係即炒即賣，上半段有利潤到手即刻落車，盡可能鋪鋪清，甚至連過夜都暫時咪諗住。
滙豐（005）上禮拜五喺美國做得好好，睇怕今早喺本港市場將啲Call輪拖到高一高。
滙豐上禮拜五喺本港升2元，今日如果再升2元，升到去84元的阻力位，要玩輪就應該揀Put輪，趁低買入，又係速戰速決，對象係9123同9366，前者波幅好大，後者較細。9234得幾日玩，唔係咁適宜炒。
章盛