日本藝能界其中一位型女偶像hitomi，噚日突然之間話下個月會走去嫁人，雖然消息未得到證實，但我大口羅拉一諗到hitomi結婚之後，可能再冇得睇佢fit過健身教練嘅身材，同埋親自設計嘅羽毛型女look，就覺得有啲可惜。
你知啦，雖然話日本女星好多個都打扮到彩雀咁靚，但講真咪又係名牌癡，但係hitomi就唔同喇，好似喺佢啱啱出嗰本寫真集《SELFPORTRAIT》入面，唔單止啲衫嘅設計索得嚟有taste，啲羽毛縛腳涼鞋重係自製㖭，羽毛指甲又夠搶，加埋佢個人夠高，真係着乜都好睇。話時話點都好睇過濱崎步成日玩七彩花甲啦！
講番佢結婚呢單嘢，原來佢未來老公唔係以前同佢傳過緋聞嘅DragonAsh成員降谷建志，而係好耐之前一隊叫GasBoys組合嘅成員，𠵱家佢喺一間設計公司做嘢。聽講佢哋專登揀hitomi下月出道八周年擺酒，但只招待親友。