醫生早兩年喺電視台都叫紅過吓，嗰時佢重事業愛情兩得意。不過，花無百日紅，近呢年佢成日去內地拍劇，佢喺香港嘅事業難免會滑落，加埋佢女友又走咗佬，所以佢呢排心情都唔多靚。
近排醫生返娘家拍劇，喺工作上佢都係認真嘅，但一離開鏡頭，啲幕後人員見到醫生冇厘心機，佢連食飯、歎下午茶都唔鍾意跟大隊。就算佢肯同大家同枱食飯，都係冇乜表情，木口木臉。醫生又鍾意玩自閉，唔出聲，總之佢塊臉就黑過玄壇，搞到其他人都唔敢埋佢身，以前佢順景嗰陣，同啲演員搭晒膊頭，唔知幾咁好傾，諗唔到佢𠵱家竟然會變咗獨家村。
英皇三T小花劉思惠（Maggie）、鄭希怡（Yumiko）及蔣雅文（Mandy），噚日喺慈雲山出席答唱會，有成三百個歌迷到場攞簽名，好鬼熱鬧。Maggie噚日同馮仁昭講話自己戴住嗰隻手表係成龍送畀佢嘅，之前Yumiko又有隻成龍送嘅手表，乜原來成龍咁鍾意買表送畀人㗎！
對於有報道指Mandy同Yumiko一齊排斥Maggie，佢哋話：「我哋三個都係好朋友，一睇到篇報道都覺得得啖笑。而且我哋已經夾好咗下次影相一齊望住同一個方向，咁就唔會俾人話我哋眼神唔一致。」
天王級紅星呢排好麻煩，佢身邊擦鞋仔多，紅星又唔鍾意聽忠言逆耳嘅說話，成日想做老闆，但商場咁險惡，佢真係未夠班同人鬥。
紅星成日以為識到啲老細可以幫佢發展事業，借人哋嘅錢去達成夢想，但呢個世界邊有咁大隻蛤乸隨街跳，所以次次都變咗係偷雞唔到蝕揸米。其實做人要量力而為，千祈唔好心頭高，做啲自己唔擅長嘅嘢。
陳見飛噚日去新港城出席活動，問到佢知唔知陳文媛同陳冠希（Edison）復合嘅消息？陳見飛話佢有問過細佬，不過Edison就話肯定冇咁嘅事。之後，記者再追問Edison同陳文媛係唔係已經分咗手？陳見飛好快咁答：「佢哋分咗手好耐啦。」
余文樂同趙頌茹等噚日去又一城出席義賣活動。對於日前余文樂同陳冠希出席電影《無間道》宣傳，被指冇偈傾，余文樂話：「我哋私下有傾偈，不過你哋（指記者）冇影相，我哋真係冇嘢。」另外，電影《無間道》原本安排喺聖誕檔期上映，不過有傳因為主角之一劉德華同麥紹棠單官司，令套戲將會無限期押後上映，余文樂話：「我接拍時知道話會上聖誕期，但搞到咁大件事真係唔知，不過華仔拍得都應該冇問題。」