話咁快重有兩個月就聖誕，呢個係Game界必爭之黃金檔期。SCEI旗下嘅LEVEL-5製作公司在前年Hit咗隻《DarkCloud》，今年以續篇《DARKCHRONICLE》迎戰。本報獲得日本SCEI提供一隻試玩碟，今日率先為大家實地測試，原來呢隻Game除咗係ARPG，重具有類似《SimCity》嘅玩法。
記者、攝影：徐影龍
《DARKCHRONICLE》為《DARKCLOUD》續篇，玩法仍以前作為依歸，不過畫面表達、戰鬥系統及迷你遊戲均大幅強化，相信新舊Fans都啱玩。
試玩版提供之內容頗為豐富，包括在廣大城填內自由活動嘅「Town」、體驗迷宮之變化及作戰之「Dungeon」及跟首領小丑戰鬥之「BossBattle」模式，總遊玩時間超過一小時，能充份表現獨特之遊戲性及爽快之戰鬥感，重分門別類教玩家操作方法，可惜新加之釣魚遊戲及自建城填系統並未提供試玩，只有兩段影片作介紹，但齋睇片已經相當吸引，足夠機迷消磨整個聖誕假期。
廣大嘅世界係《DARKCHRONICLE》特色之一，試玩版內起初之城鎮已十分之大，要搜查所有地方及跟市民交談，差不多需要一小時，城鎮以3D做成，要轉換視點發掘隱藏事物，利用拍照系統作記錄，以便主角日後發明各式道具。遊戲主角分別有13歲天才發明家Yuris及來自一百年後之謎少女Monica，戰鬥時可自由換人，更可隨時駕駛機械人及扮怪物等。
迷宮用自動形成方式，每次進入都唔同，試玩版雖只有「七色蝶之森」一關，不過每次進入都有變化，重會加入環境元素，如落雨、黃昏等，道具位置當然亦次次唔同，玩家毋須畫地圖，要多多利用「Select」掣之地圖放大功能。
《DARKCHRONICLE》加入唔少新系統，主線發展劇情外重有好多嘢玩，最正係「魚樂無窮」及「模擬城市」。玩家遇上湖同河可進行垂釣活動，釣到咩魚就要睇你功夫同魚餌，重可放喺家中魚缸飼養並參加「賽魚」，獲勝後有獎金，話唔定某類特殊道具要靠呢個方法獲得都未定。
另外，到遊戲中段玩家有機會着手建設自己嘅家鄉，各款屋仔任你設計同擺放，重有欄杆、花叢等裝飾物提供，玩法十足十《SimCity》咁，相當得意有趣。
今次搵嚟兩位對ARPG都有濃厚興趣嘅機迷，率先在推出前試玩一下《DARKCHRONICLE》，睇吓能否吸引佢哋買嚟玩。
ARPG我玩唔少，真係滿意嘅只有《聖劍傳說》同《薩爾達傳說》系列，不過呢隻《DARKCHRONICLE》做得真係唔錯，令人有種追玩嘅衝動，希望呢隻Game推出日期唔會同《薩爾達傳說GC》太接近（12月3日），否則肯定連瞓覺都冇時間。
畫風及戰鬥系統我都好鍾意，尤其係建設屬於自己嘅城鎮，因為我好鍾意玩《SimCity》之類嘅Game，今次可謂一次過滿足我兩大喜愛玩法。唯一不滿係城鎮實在太大，心急戰鬥嘅我有時覺得都幾悶。
遊戲類型：ARPG
對應機種：PS2
遊玩人數：1人
推出日期：暫定2002冬季
開發商：LEVEL-5
官方網址：