「我唔介意佢識任何女人」
毛玉萍向現實低頭

早前周正毅接受訪問時力撐緋聞女友楊恭如，周太毛玉萍沉默多時，卻於此時表示老公認識任何女性朋友，她都不會介意，亦不會因此影響夫妻間的關係，她的言論看來已接受了現實。

楊恭如日前在銅鑼灣COVA餐廳遭當眾掌摑，緋聞男友周正毅事後力撐楊恭如，除有致電楊恭如慰問外，還表明會繼續約會對方。不過，由楊恭如和周正毅傳緋聞至楊恭如被掌摑，周正毅太太毛玉萍一直未有對事情表態，傳媒每提起楊恭如時，她亦只是以冷笑回應。
毛玉萍沉默多時，前晚她在港島某私人場合接受記者訪問，首度就事件開腔，但她並非聲討任何人，反而力撐老公，表示周正毅結識任何異性，她都不會介意，亦不會影響自己和老公的關係。表面上毛玉萍的言論似乎是向現實低頭，但以退為進，其實亦不失為聰明的做法。（以下是訪問內容）

楊恭如沒令她不安
「佢係普通應酬」
記者：記毛玉萍：毛
記 ：你識唔識楊恭如？
毛 ：唔識。
記 ：你知唔知楊恭如同你老公係好朋友？
毛 ：我睇報紙知道。
記 ：楊恭如嘅出現有冇令到你唔舒服？
毛 ：冇！
記 ：楊恭如被打同你有冇關？
毛 ：冇關。
記 ：你知唔知你老公接受電台訪問話會同楊恭如繼續來往？
毛 ：佢同我解釋過，話因為佢嘅廣東話唔正，言語間有誤會啫，其實佢做生意應酬，成日都會結交唔同嘅女性朋友。
記 ：你老公私底下有冇因為同楊恭如嘅緋聞而對你表示歉意？
毛 ：佢只係普通應酬，根本冇咁嘅必要。

管理夫婿財政十幾年
「佢好信我」
記 ：有消息話你老公喺上海買樓畀楊恭如。
毛 ：周生冇認過呢件事，我同佢係拍檔，佢嘅財政我當然好清楚。
記 ：你老公容唔容易送樓畀人？
毛 ：我從來都冇問佢。
記 ：周生係咪風流嘅男人？
毛 ：佢唔風流，佢全副精神都放喺做嘢度，佢好注重事業同家庭，亦好信我，十幾年以嚟，佢都將財政交畀我管，今次啲新聞傳成咁，我覺得對佢好唔公平，好似講到佢係花花公子咁。
記 ：一直以來，你先生多唔多異性朋友？
毛 ：我從來都唔理呢啲嘢。
記 ：你嘅意思，係咪任何女人，都唔可以影響你同周生？
毛 ：係！我同周生係由零開始，大家都好珍惜對方，呢十幾年我信佢，以後都會信佢，佢認識任何異性朋友，我都唔介意，亦唔會影響我哋之間嘅關係。

無懼女人死纏老公
「佢好有定力」
記 ：怕唔怕啲女人對你老公死纏爛打？
毛 ：佢份人好有定力。
記 ：你對佢信心有幾多？
毛 ：百分之一百。
記 ：你同老公一齊有幾耐？
毛 ：我同周生識咗好耐，一齊十幾年，有今時今日，都係大家一齊奮鬥出嚟。
記 ：你老公係咪上海首富？
毛 ：我老公唔係乜嘢上海首富，呢個稱號唔係我哋自己講，我哋亦唔想有呢個稱呼，𠵱家我哋重奮鬥緊，希望傳媒由今日開始，唔好再用呢個稱呼，我哋只係一般商人。
記 ：你哋見面嘅時間多唔多？
毛 ：佢都係以生意為重，有時佢喺上海，我喺香港，分開兩個地方，但通常一有假期，我哋就會一齊去度假。

避談有否註冊結婚
「大家知我係周太」
記 ：喜慶日子，周生會唔會同你慶祝？
毛 ：今年我生日，喺348Disco開咗個生日party，都係周生安排嘅。
記 ：有傳聞話你同周生冇正式註冊，究竟係咪事實？
毛 ：有冇都唔重要，最重要係我同佢之間嘅關係係點，內地同香港嘅商界、社交界，都知道我係周太。
記 ：點解今次你肯接受訪問？
毛 ：因為我睇完報道，好替我老公不值，我先生嘅正常社交，係唔需要同傳媒交代，佢同邊個異性朋友飲咖啡，我都唔介意。
採訪：張止寒、陳月媚
攝影：甄朝健