今日釜山亞運就會圓滿結束。喺新聞中心入面，好似我地班記者呢三個星期埋頭苦幹，終於可以因為冇乜比賽而唞唞。所謂臨別依依，有時間就梗係買啲亞運紀念品當手信，唔少得就係同一班好幫得手嘅義工合照留念啦。
好奇怪，以往大型綜合運動會，閉幕禮多會係星期日舉行，但今次釜山就延遲咗一日。講番今次閉幕禮，全程要一個鐘零五十分鐘，而主題叫做「歸家」，大會預計將有三十七億人透過電視收睇。
小記千辛萬苦搵到閉幕禮嘅節目表，當然第一時間同大家分享。閉幕禮係香港時間下午五點半開始，拉開序幕即係今屆幾個經典嘅比賽片段；緊隨就係立體激光表演，以及一千人銀樂隊步操，之後就到各參賽國家代表入場。一輪歌星演唱、會旗升起後，就到賽會主席發言，並公布「珊珊」有份參選嘅亞運MVP選舉結果。
跟住下屆主辦國卡塔爾就會出場接過亞運會旗、同時進行火炬交接。然後，一班舞蹈員載歌載舞，大會同時發放過千氣球同飛船，跟住釜山主場館內就噴出大量五顏六色碎紙，而場館外更加有煙花助興。咁樣，四年一度嘅亞運會就正式宣布降下帷幕。