意大利喺主場對南斯拉夫嘅歐洲國家盃外圍賽失分之後，相信佢哋喺星期三作客威爾斯嘅大戰更加好睇，話時話，呢場波重帶挈埋威爾斯中場沙維治多咗好多Fans。
效力伯明翰嘅沙維治由於外形一般，踢波又茅茅哋，而且又鍾意曬名牌，啲球迷一向唔係咁鍾意佢，不過喺威爾斯對意大利場大戰愈嚟愈近時，佢嘅Fans愈嚟愈多；除咗寫信叫佢努力外，重有唔少係問佢攞呢場大戰嘅波飛㖭！沙維治好自豪咁話：「我𠵱家嘅Fans數目係歷來最多嘅，有唔少Fans重願意出三百鎊（約三千六百港元），向我買意大利嗰場面值十五鎊嘅波飛！」
咁我求大俠就想問，究竟啲球迷當沙維治係偶像抑或係黃牛黨呢？
英格蘭國家隊門神占士對國家隊嘅貢獻，除咗我求大俠之前爆佢可以響佢個斯洛伐克籍女傭身上刺探軍情外，𠵱家又收到風原來佢重係奧雲仔嘅「髮型師」㖭，奧雲話貪佢對手夠靈活，剪髮好手勢喎！唔知占士重會唔會幫其他國腳「操刀」呢？不如搞搞施文嗰個成日被人批評嘅髮型吖！
英國巴斯大學嘅足球隊響上周六贏咗新港三比○之後，已經殺到入去今年足總盃外圍賽第四圈，如果佢哋再贏埋第四圈呢一場，就可以參加足總盃首圈賽事。即係話佢哋好有機會成為一百二十二年以來，首支取得足總盃參賽資格嘅學校足球隊。咁難能可貴，我求大俠就響度預祝佢哋成功！
保頓件法國後衞尼葛迪都傷咗好一段時間，而且重係醫極都醫唔好。最近終於復原有望，原因竟然係食中藥睇中醫，重犀利到可望響下個禮拜復出㖭！我求大俠身為中國人，都有啲為呢件事感到與有榮焉，你話尹巴斯頓當年若果試吓我哋中醫，可能都唔使咁早收山！
阿仙奴呢排喺歐洲球壇認真威威，贏到唔停得手，佢哋嘅巴西中場G施華就讚「兵工廠」係全球最佳球隊，重話為報答阿仙奴領隊雲格知遇之恩，可以幫手叫巴西前鋒朗拿度過嚟！不過，我求大俠就覺得就算朗拿度真係嚟，阿仙奴都未必要，事關佢人工貴，是非又多，無謂要佢嚟整壞晒隊波士氣啦！