豐田EchoVerso可算係Echo嘅RV版，自在港推出以來，自動波版本售價曾一直高達14萬元以上；而代理喺今年上半年，突以唔使11萬嘅價錢推廣配用自動波嘅雙天窗版本，吸引力較前增加不少，同時亦憑着其頗高嘅實用性，喺二手市場上亦變成搶手貨呢！
今次減價推廣對二手EchoVerso嘅衝擊力，較預期中嘅輕微，原因係豐田屬家庭車公認嘅名牌，二手價格抗跌能力一向好強，例如1998年嘅Corolla一度賣10萬有找，4年後嘅今日仍值4萬多元，可見豐田汽車嘅保值力強。而現時EchoVerso嘅自動波型號，1999年車市價約5萬5千元，2000年則約為6萬3千元，而2001年車則企穩7萬5千元或以上，2002年才落地嘅新車，更可賣接近9萬元，比新車折讓約兩成。
由於造型比Echo來得更Cute，能否接受實屬見仁見智；不過，EchoVerso有一項賣點係較Echo優勝嘅，就係後座可完全收藏於車廂地台之下，令尾廂載物量可媲美半架貨Van㗎！但針無兩頭利，由於後座為遷就可隱藏式嘅設計，座椅做得略為單薄，舒適及承托力亦較一般家庭房車弱；幸而特高車廂配搭，乘坐夠開揚之餘又能追回不少分數。
選購二手盤時，首先要知道自動波型號，有軚自動波及地台自動波兩個版本，當中1999年及2000年早期款式，全屬地台式自動波，前後期型重有軚盤及中控台上某些裝備有些許出入，但設備及功能則一樣。
而揀選車盤時最好以家庭用車為首選，因為呢類用車甚少將尾排座椅摺起，反而一啲半公半私用嘅放盤，前車主可能經營小生意，車子會長期用作載貨用途，車廂打理亦會較差；但無論屬邊類型嘅放盤，都應認真檢查後座收摺、地台墊板及頭枕等配件是否完好無缺，免得日後要花上大筆金錢作出維修。