久別重逢的上環大笪地昨天開始試業，還未正式開檔，港島其他地方如香港公園、蘭桂坊、赤柱美利樓等已有多個嘉年華紛紛蒲頭；但對小市民來說，放假只想開開心心吃喝玩樂，話之你鬥餐飽，最重要選個又抵又好玩的墟來趁，𠵱家就等我哋同你昅吓邊個至啱玩啦！
記者：陳漢榮、李玉蘭 攝影：伍慶泉、陳盛臣 ImagePeople：Angel、阿碧、阿威
昨日試業的大笪地佔地68,000平方呎，分購物、遊戲和飲食三區，共313個攤檔；較十年前拆卸的第一代大笪地，擁有500多個攤檔，雖然面積細了點，但「平民夜總會」的特色依然保留，不過，試業期間有好多攤檔仍未開張，不過經我哋捐窿捐罅，都可以帶大家睇吓有乜筍嘢嘅！
店名：缸瓦佬散貨場（A7,8,13,14,19,20）
舖面夠大，款式夠齊，豉油碟都有過百款！由於老闆做開酒樓餐廳食具批發，有大把坊間無得賣嘅獨家貨品，最平嘅碗仔、匙羹、筷子架等$2任揀，最貴嘅茶爐都不過$98，重有慈禧太后點心碗$10、日式茶壺$35、磨薑碟$5、古怪盤$28、波浪碟$25等，驚你買得起拎唔郁。
店名：三姊妹手袋精品店（C84）
你噏得出，佢穿得到！有狗仔、BearBear熊、青蛙、叮噹、儍豹、聖誕老人、長龍、手袋仔等50款造型嘅水晶公仔任你揀，價錢由$10至$99不等，落5%訂，兩日後攞貨，唔阻你時間。
店名：你以為係 原來唔係（C44）
入定萬聖節玩具係時候，強力推介「噴血骷髏頭」$69，其他整蠱人嘅小玩意如痕粉、愈洗愈污穢嘅搞鬼番梘、整極唔熄嘅煙仔，統統$10任摷，重有五顏六色性感小T-back$10，女人街都要賣$50啦！
店名：花之戀（A6）
無幫襯都請你飲番杯免費花茶，每星期轉換一種花茶口味，首星期請飲薄荷薰衣草，其餘有紫羅蘭、玫瑰、茉莉等，價錢由$12至$65不等，買5細包裝或3大包裝，即送茶壺；另推介環保無煙薰衣草蠟燭由$12至$20。
店名：穎豪健（A21-23，17號正式營業）
前排好鬼Hit嘅出氣球，新出改良版，暫時未見坊間有得賣。改良版多咗條嘢，任Fing唔甩，大力揸，裏面嘅骷髏頭、蜘蛛、四腳蛇會蒲上面，任揸唔爛，畀你出氣，幾盞鬼！
赤柱美利樓十月份的國際嘉年華以德國啤酒節和西班牙國慶，打正旗號，大割價發售德、俄、泰、新疆和西班牙地道美食，三、四十款全部即做即食，還可邊看舞台上的魔術和歌舞表演，與來自不同國籍的遊人喝酒談天！
香港公園開設咗個藝趣坊，提供繪畫、攝影、書法、刻圖章、素描服務等1?0號攤位，或許可令你增添不少藝術氣質。
檔主葉先生有十多年雕圖章經驗，「快」工一樣可以出細貨，留低姓名，先畀錢後畀貨，15分鐘後一個屬於你嘅篆刻石章（小$70，大$80）正式面世。
每件T恤都是檔主Flora嘅親筆傑作，保證獨一無二，視乎圖案難度，價錢由$90至$300不等，你亦可以主動提供圖案，價錢面議。
呢個係最受小朋友歡迎嘅攤檔，檔主10分鐘極速素描，形神俱似，A4Size索價$70，若想畫粉彩畫或油畫，價錢面議。