尋遍香港最地道的炭爐煲仔飯，廟街當之無愧，惟近年到此一遊都難見百爐齊燒的場面，打聽之下，原來食環署人員在黃金晚飯時間掃場，不少檔口為免抄牌，都收拾露天座位，不過小記給大家一個貼士，想歎最地道街邊風味的煲仔飯，夜晚十一點後來廟街，定會食到你的心頭好。
記者：梁佩芬
攝影：陳盛臣
二十多年前，陳小姐爸爸開始在廟街做小販賣煲仔飯，以前都是推車仔周圍走，後來在現址開檔，算是有個固定位置，當時只賣四種口味：排骨、臘味、牛肉及滑雞，每個都是$8，多數都是老人家或者經常混廟街的人居多。到現在最好賣的原來都是二十年前這四款口味，當然，時至今日亦會加上其他不同材料，配搭已超過二十多種，有鳳爪滑雞、牛腩、魚雲、田鮮、白鱔等。近幾年，連潮州打冷同海鮮都做埋，因為煲仔飯都好難一年四季都咁好賣，要擴大菜牌選擇先可以增加客路。
「講講吓都好奇怪，八點打後，大多數客人都係後生仔女，有時每個人消費都有一百蚊，當然都有兩個食一個$18煲仔飯；有時再加上遊客，近排秋涼，每晚都可以賣到300個煲仔飯，希望一到寒冬，生意額可以倍升啦！」
「其實三年前一個最平嘅煲仔飯都要二十蚊。唉！今年廟街個個都賣$18，你重買二十蚊就無人會嚟食，減價囉！連帶其他食物都大碟咗，寧願賺少啲，總好過連做都無得做吖！」
大家鬥平，都係因為廟街競爭大。
「由文明里至眾坊街呢段前廟街，以前都只得三間賣煲仔飯，無位都會等吓，因為無得揀，𠵱家連茶餐廳都有，人客見到呢間無位，都行去第二間食，無話正宗唔正宗，有得食就算。」
「話廟街競爭大，經濟唔好，食環署每晚7至11點掃場其實影響最大，佢哋一星期掃七次，每晚七點至十一點就企定定唔准我哋開露天檔，我間舖咁細，坐唔多人，喺晚飯黃金時間掃場，生意額一落千丈。曾經試過趕唔切收檔，罰咗幾千蚊，大半晚生意咁就冇咗！」
有餐館牌都要掃？
「佢哋話呢段廟街唔係行人專用區，我哋檔口唔可以開到出街。」
眾坊街後的廟街已劃分為行人專用區，前陣子辦「瘋狂購物在廟街」活動，但前廟街則沒有份兒。陳小姐愈說愈氣憤：
「有時覺得好唔公平，衞生幫（食環署人員）又唔係由文明里一路掃到眾坊街，得閒喺熙龍里（即興記位置）企幾個，但下一條永星里又唔企，嗰邊就可開檔，我呢度就硬食無生意。」
數年前已有商戶向區議員提出，要求政府將前廟街劃成行人專用區，將地道美食發揚光大，但商戶不團結，只得陳小姐一把口，可以做到甚麼？
到廟街搵炭爐煲仔飯，初時見到開到成行成市，人人食得滋味。問老闆可否採訪，老細陳先生話：
「你想影相都得，但一走鬼就乜都冇晒！香港政府係唔畀人燒炭做生意！」
第二晚，小記晚上七點一到，見到一隊食環署人員企定定，再望合興的「炭爐陣」已不見了！第三天，七點十五分到訪，食環署一行十多人蜂擁下車，但這時廟街露天檔口已經收晒！原來在發餐館牌時，申請者可向消防處提出用炭做燃料做生意，並一定要在室內煮食及建一條直通上天台的煙囪排走廢氣，但這工程浩大又費用高，小餐館負擔不起，有時就要偷雞進行。
▲興記菜館
▲地址：廟街19號地下
▲電話：23843647
▲營業時間：5:00pm-1:00am
▲付款方法：只收現金