正當Smart快將正式抵港之際，全球車迷期待已久嘅SmartRoadster及RoadsterCoupe，亦將於明年初正式登場；除造型設計甚具跑味外，改換上全新引擎配搭後，動力輸出數值更較原有Smart型號來得更強勁，加上獨特車廂配搭，睇落又真係幾有瞄頭噃！
全新SmartRoadtser及RoadsterCoupe嘅造型，可謂甚具跑車風采，其中較原有Smart型號，變得低矮及拉長嘅車身，襯以四輪拋沙板及15吋合金胎軨組合，就最能將呢個特點展露出來。
與原來嘅Smart一樣，新車亦用上雙座位布局，而設備配搭又見齊全；當中包括有一雙跑車座椅、真皮軚環及波棍的等等，而用家又可以選配真皮跑車座椅，以及全新CD音響組合等等作配備。重有，你亦可考慮廠方提供嘅SportsPackage（包括三幅式跑車軚環，以及16吋合金胎軨連205/45R16輪胎）㗎！
然而，廠方為新車裝上一台698cc嘅直3SUPREXTurbo引擎，馬力輸出約84匹，配以6前速Sequential半自動波箱，加上極輕嘅車重，無論起步加速都可有出色嘅表現。而懸掛系統及剛勁有度嘅車架，響多套電子系統如ESP等等嘅輔助下，亦可有助增強行車時嘅路面循迹性㗎。