今日係重陽節正日，好多人都會去拜山，但係班企業總裁仍要開工，好似本地電訊業巨頭，電盈老細李澤楷就去咗日本，幫四季酒店（FourSeasons）喺東京嘅新店剪綵。
事緣四季新店位於東京丸之內商業中心區，即係李澤楷私人投資嘅PacificCenturyPlace內，搵到間咁出名嘅酒店喺自己地頭開業，當然要畀足面。
呢間四季佔用大廈三樓至七樓，只有五十七間客房，包括九間套房，每間房均備有高科技設施，如等離子（Plasma）電視，可寬頻上網等，另外又有私人宴會廳，兼二十四小時的會所同商務中心。雖然未知價錢，但肯定會成為東京內數一數二的高級酒店。
嗰度鄰近好有歷史嘅東京火車站，去日皇居所御苑同銀座都好近，所以一直係地王，當年小小超投得地皮都好轟動。
各位老細，下次去東京，又多間靚酒店揀喇！
（圖）東京四季酒店佔用PacificCenturyPlace大廈嘅三至七樓。
傳真︰2623-9278
電郵︰