日本當紅嘅女星，好似𠵱家上咗岸嘅菜菜子、鈴木京香，又或者重上緊位嘅米倉涼子，都係做啤酒女郎或者泳衣代言人出身，咁多代都冇變過。
不過，計我大口羅拉話，揸住杯啤酒擺吓甫士，喺今時今日鍾意玩花臣嘅藝能界，係唔夠嘅，所以乜乜girls嘅二人女子組合就喺水着界應運而生。我羅拉呢期就最睇好嘅係二十歲嘅小川奈那同二十三歲嘅益子梨惠組成嘅SpaceGirls喇。
雖然小川做咗Saporo啤酒同東洋紡製衣連續兩年嘅代言人，而益子就係佳麗寶SwimWear女郎，都算有啲來頭，可惜呢類女仔喺日本藝能界簡直通街都係！好彩佢哋就聰明啲，組成SpaceGirls之後，就幫有名水着雜誌《Sabra》影相，實行做日本版Twins，着住泳衣大打騎呢側手翻，學足啱啱出道嘅Twins。
今個月二十五號，日本雅虎重會上映小川同益子嘅處女網上電影《Contactus!呢度係萬事幫事務所》，睇嚟都有機會跑出！