上個星期初無論係美股定係港股，總之係股票都無乜運行。港股唔單止跌穿晒舊年911後嘅低位，更加喺上星期四跌穿過8800點，不過唔知係港股命大定係班芬佬仁慈，個市穿咗底之後就已經見佢哋收晒手，重喺美股急速反彈下升番上8900點水平。
上個星期初美股之所以咁差，除咗經濟數據唔好之外，最重要重係有幾種強勢大藍籌俾班證券分析員調低咗投資評級，搞到班投資者完全唔理部份企業公布好消息，就將手上嘅股票亂質可也。
有個專做美股分析嘅朋友話，美股其實一啲都唔差，尤其係晶片股，聽聞下個星期公布業績嘅英特爾，業績會好到你唔信，所以叫伏勝留意本地嘅晶片相關股，話班大戶會借勢炒番郁啲股仔，尤其係上星期五升番上嚟嘅品質國際（243），話唔定重可以有多十零個巴仙執吓。
講開晶片股，前排國內公布成功製成由中國所開發嘅第一塊電腦晶片，雖然重未夠花旗貨撼，但已經係踏出成功第一步。喺咁多隻科技股仔之中，伏勝仍然覺得隻文傳（343）係有啲計，佢哋之前已經傳緊同美國IBM成功研製咗第一塊以中文指令為基礎嘅晶片，聽講已經快可以推出市場，可能會喺短期內作出公布。班大戶一聽到呢個消息，已經開始作好準備，炒番郁隻股仔，睇番文傳個價，的確喺上個星期已經企穩咗喺兩毫子水平，而且重有唔少見慣見熟嘅行家喺度買緊貨，如果真係要炒嘅話，相信就只要等有番多啲成交額先可以。據文傳內部嘅線人所講，佢哋好似會喺短期內有啲動作，話應該可借勢炒番上去3毫子樓上。
伏勝