日本搖滾班霸GLAY，今晚將在北京工人體育場舉行五萬人盛大演唱會，今次他們豪擲一千萬美元（約七千八百萬港元），炮製中國有史以來最豪華的音樂會，免費入場，作為送給中國fans的禮物，以促進中日兩國友好關係。
GLAY前日舉行記招，他們到埗後，即接受港、台及內地傳媒訪問，身為隊長的TAKURO說：「北京嘅演唱會規模同日本一樣咁大，我哋亦會參與舞台設計，例如點樣擺放巨大嘅螢幕同埋放煙花嘅特別效果等！」
態度友善的GLAY與內地工作人員合作愉快，TAKURO說：「個show一年前已開始籌備，雖然我哋同中國嘅工作人員文化唔同，溝通上亦有困難．但大家好努力溝通，所以合作得好愉快！」
TAKURO續說：「早排同中國國家主席江澤民見面時起初好緊張，聽到佢話希望我哋透過音樂加深日中友誼，緊張嘅心情即刻獲得解放。𠵱家我哋只係擔心開騷嗰晚得攝氏四度咁凍，不過，我哋相信主音TERU個名有『放晴』嘅意思，會帶嚟好天氣！」做足準備工夫的TERU則說：「我到時會講『高興嗎』、『High唔High』嘅普通話搞吓氣氛㖭！」
北京的電台近日不斷播放GLAY的歌曲，不少來自北京以外地方的fans更一早在酒店等候偶像。樂隊今次花費近八千萬元搞免費騷，並預備了T恤、風褸、布袋送給入場觀眾，藉此希望內地的年輕人能欣賞一個真正的盛大音樂會。GLAY亦掛念香港fans，TAKURO說：「我哋明年秋天一定會到香港開騷，大家聽住我哋嘅唱片等吓啦！」
本報記者張一明北京直擊