噚日禮賓府嘅授勳禮熱鬧非常，兩位「捍衞」《基本法》二十三條嘅女悍將──梁愛詩獲頒最高榮譽大紫荊勳章，葉劉淑儀則攞到金紫荊星章。不過可能見呢排風頭火勢，兩位女士攞獎後都匆匆離去。
另兩位大紫荊得主，田長霖抱恙缺席，剛喪偶嘅鍾逸傑亦無心慶祝，所以全場最High嘅大紫荊得主要算係煲呔曾，領獎後滿場飛，又向記者大談興奮心情，太太、仔仔陪伴左右，任職銀行嘅妹妹也來捧場。細佬曾蔭培一身雪白嘅警服，連同太太同阿哥合照慶祝，重不停有嘉賓慕名要求合照，煲呔風頭差啲勁過阿董。
除咗煲呔，一家親出現嘅重有得到金紫荊嘅周德熙。周生帶埋太太黃英琦，同法國留學嘅千金。噚日周小姐一身型女打扮，長長曲髮加黑背心，臂上重有花環紋身水印。八方知道佢喺法國讀完高中，準備到世界各處遊學一年先讀大學，真係羨煞旁人。
演藝界方面有羅蘭、鮑德熹、鍾景輝等攞獎，羅蘭姐攞到榮譽勳章好開心，原來佢從影四十年從未做過主角，「我唔會唔甘心，配角發揮重大，周街啲人都認得我係『龍婆』都幾好！」
傳真︰2623-9278
電郵︰