《蘋果日報》喺十月八日，以「好強的八字」為題，形容陳水扁個孫陳翊安嘅八字，此子經剖腹時間安排，在十月七日上午七時零八分出世。上午七點照計係丁巳時，不過權威名家蔡伯勵以前講過，喺中國地區，時辰未必一定為五至七、七至九之類，推遲十五分鐘亦無妨，因此陳翊安嘅時辰八字就係壬午年己酉月戊申日丙辰時。一樣嘢左丁山唔係幾明白，剖腹產子手術一般需要四十五分鐘，七時零八分出世，即係六時二十三分開始開刀，急啲喎，點解唔提前到早上五點幾開刀，確定嬰兒在丙辰時出世呢？唔好睇輕呢幾分鐘之差別，丁巳時係差過丙辰時㗎。
問八卦邱點解呢條命好強，八卦邱話唔多得閒研究，叫左丁山搵本《造元化鑰》睇吓。拎本書查吓，喺八月（己酉月）戊土一條，有云：「八月戊土，金洩身寒，賴丙照暖，喜水滋潤，先丙後癸，不必甲疏。」
解釋：八月金（酉金）旺，因土生金，金旺即係土（戊土）洩，土洩咗氣就身寒矣，需要丙（太陽之火）照暖；暖土太過就變成燥土，需要雨露之水（癸水）滋潤之，故此命書話「先丙後癸」，此命若無丙無癸，乃係冇用之人，冇丙火，係常人，故此一定要在早上五時至七時間出世先至係好嘢，嚴格嚟講，阿扁之孫嘅八字之中，只有壬水（大海河之水）而無癸水，壬水雖可潤土，亦可衝擊泥土，唔係好盞。好彩辰時內藏癸水，亦可一用。力量則不大矣！