繼珊珊、羅雅菁喺比賽期間受傷入院後，噚日玩越野單車嘅女將楊嘉華（圖），因為之前練習撞傷頭，搞到唔能夠完成正式比賽，之後重要入院照X光檢查，好彩最後冇事出院；接二連三發生意外，睇嚟釜山對香港運動員真係幾唔吉利，尤其係對女選手。
噚日越野單車比賽，楊嘉華玩咗一半就因傷退出；佢話因為之前練習炒車，撞傷大腿同個頭，初時以為冇乜大礙，點知正式比賽至中途就支持唔住，之後重有頭暈眼花情況，所以就即時去醫院照X光。
記得前日羅雅菁拗柴入院，有傳香港隊冇醫生喺釜山照顧運動員，但其實事情唔係咁；話說港隊隊醫李醫生知道羅雅菁入院，已經第一時間趕往醫院了解情況，最後重陪佢出院返回選手村休息。
港隊黑氣重重，希望喺獎牌總數破咗上屆紀錄後，加埋何兆麟同胡兆康昨日攞咗特區榮譽勳章沖喜下，港隊可轉運。