鄺文珣自從同鄭敬基分手之後，同StarEast簽咗經理人合約，重喺台灣以玉女形象出國語碟，但喺香港就好少出現。點知前晚見到佢同男性友人喺蘭桂坊出現。佢個男性友人外表睇嚟都幾年輕有型，不過鄺文珣一見有人影相就即刻彈開，重耍手擰頭話嗰個係普通朋友喎！
前晚十一點左右，鄺文珣同幾個朋友，一齊喺蘭桂坊出現。佢同其中一個着白色衫嘅男仔行得好埋。鄺文珣一見有記者影相，就好刻意咁同個男仔保持距離。馮仁昭問佢係咪新男友，鄺文珣就耍手擰頭咁話：「朋友咋，朋友咋，朋友行街咋，冇乜特別㗎。」然後雞咁腳走人。
其實正常男女交往又使乜咁驚青，佢咁刻意否認，畀人感覺咪重此地無銀。
萬綺雯噚日以參賽者身份參加《百萬富翁》藝員版，唔經唔覺萬綺雯已經同編劇陳十三結咗婚兩年，佢話平時冇工開，都會做吓跟得夫人陪老公開工。佢重話遲啲老公會返內地拍電視劇，本來自己都有份演出其中一個角色。不過，套劇賣咗畀無綫，萬綺雯同亞視重有約，所以就唔拍得。
孫佳君噚日本來同小雪等出席喺沙田一個護膚品牌嘅美容展覽。不過，到活動完咗都未見孫佳君出現。
馮仁昭問在場嘅公關孫佳君點解冇出現？公關話佢趕緊嚟。過咗一陣，公關又話孫佳君啱啱返香港，喺機場離開嗰陣俾狗仔隊追蹤，所以唔能夠出席。唔知孫佳君係咪怕俾人問有關羅兆輝破產嘅事而甩底呢？
闊太同花心老公搞緊離婚，等佢嗰間屋裝修好之後，闊太就會搬入去住，過新生活。𠵱家佢算重獲自由，所以佢都唔理花心老公，成日去搵男人陪佢玩。兩年前佢已經有計劃想同老公離婚，當時佢愛上咗個靚仔，如果個靚仔肯同佢結婚，佢就諗住放棄做闊太，一心跟住對方。可惜，佢兩個最後都係分咗手，聽講呢件事對闊太都做成幾大打擊，所以佢要不斷搵男人填補空虛嘅心。
任賢齊噚日喺馬鞍山舉行慈善活動。只要捐二百蚊就可以有一張小齊嘅簽名巨型海報，而小齊亦攞咗一件見佢着過幾次嘅法拉利T恤出嚟拍賣，重要係未洗過嘅。最後有fans用二千蚊買咗件T恤，不過小齊覺得有啲唔好意思，要人哋買佢未洗過嘅衫。