自當年與夏文汐拍攝首部電影《朝花夕拾》至今，方中信不知不覺間已入行十多年，雖然現在他無論在電視還是電影上，也擔正做主角，但感覺上他做事還是不夠積極，致令事業發展方面未到高峯。
方：其實我運氣都算好好㗎啦，咁嘅性格重可以生存到𠵱家！我份人好硬頸，唔識同人打關係；有好多人好叻，將一啲完全冇發生嘅嘢去作古仔同記者講，等人可以注意佢哋，但呢套唔啱我。
方中信表示，有次他到跑馬地一間車行睇車，剛巧樓上裝修，一些沙石從樓上掉下來，不偏不倚掉正他頭上和一部名貴新車上，車行的人報警，警員到場後着他到醫院驗傷，但方中信擔心會引來記者採訪，寧願自行敷藥算了，如此低調，又難怪他父母說他沒甚麼新聞見報。
方：我承認我做事唔夠積極，呢方面我父母同女朋友都話過我，但我認為只要自己覺得舒服，又搵到餐食咪得囉，反正我又唔希望大紅大紫，我好易滿足嘅。
方中信是愛車之人，擁有四部座駕的他（連計送給女友那部），單是每月養車費也十分可觀，而他除了是汽車發燒友外，更喜歡收集名表，以致不時被女友責怪他太過敗家。
但方中信說：「我又冇乜其他嗜好，又唔鍾意買衫，我𠵱家着緊呢件衫，都係買咗好耐先至攞出嚟着，至於條褲，重係之前去台灣拍戲啲戲服，幾百蚊，我只係鍾意車同表啫，又唔係壞。」
撰文：戴彩煥 攝影：陳偉權