海外車訊：
新版豐田HiluxSurf剛勁十足

近期，日本豐田車廠先後推出有多款新車，並瞬即成為車迷焦點；繼新版Corolla同Caldina後，響本月初又推出新一代HiluxSurf。新車造型不但較前來得更富剛勁感外，車廂鋪排及設備亦有所改動，務求迎合現今汽車潮流；不如今日一齊嚟先睹為快，睇睇新車有何吸引力啦！
記者：黃凱穎

車廂布局獨特吸引
車廂布局亦有多項改動，當中全新設計嘅中控台組合，設備齊全易用之餘，三圓表板布局亦見閱讀清晰方便；另外四周重鑲有金屬面板裝飾，從而予人有一份既時尚又High-tech之感。空間亦見寬敞闊落，當中頂級版更備有高級真皮座椅配搭，承托力甚豐之餘更備有獨立頭枕，乘坐倍見貼服舒適。

引擎配搭選擇多
廠方亦為新車提供有多台引擎配搭供用家選擇，其中頂級版所採用嘅一台3.4公升V6偈，馬力185ps/4800rpm，扭力30.0kgm/3600rpm，匹配一套4前速自動波箱，從而令新車可有出色嘅性能表現；而出色懸掛系統，響剛勁有度嘅車架及四驅系統（另有兩驅版供選擇）輔助下，行走任何路面，都可有不俗嘅表現㗎！

剛強形象具吸引力
新版豐田HiluxSurf嘅造型設計，與舊有型號一樣來得甚具剛勁感；除全新鬼面罩配搭，響一對頗有神氣嘅頭燈組合襯托下，令車首造型變得更具吸引力外，四輪拋沙板設計、極富肌肉感嘅車身線條及較高離地距，亦能將其SUV形象表露無遺㗎。