美股大升，港股係咁意應酬吓，恒指只係上升107點，收市仍然係9字頭以下。滙豐（005）最醒神，收82元，有2元進帳，此乃電腦所判嘅收市價，收市時81.75元有14萬股求沽。
滙豐Call輪有6件打入龍虎榜，升幅由19%至4%不等。當中成交金額最勁嘅係9225，由40.5仙彈上48.5仙埋單，升幅近2成。呢件下月初夠鐘，溢價1%，槓桿率16.9倍。對於滙豐升跌，呢件因為溢價接近平水，反應最為有數得計，唔似得其他高溢價、大槓桿率嘅同類輪。
滙豐Put輪，則因為正股升而散落去，例如9234同9123分別碌低70%同39%。
滙豐上落三兩蚊，啲窩輪天翻地覆。呢幾日由低位78元彈上嚟，已有4元升幅，𠵱家Call輪追唔落手，要博嘅應向Put輪埋手。如前所述，無論造好造淡，注碼要細，手腳要快。
威水輪中有隻石化籃子Call輪9242，收4.8仙，升幅30%。成份股有中石化（386）、上海石化（338）同儀征（1033），明年1月到期，溢價14.7%，槓桿率20.2倍，單睇數據未必輸梗，揸到尾都有3成機會出生天，但買賣稀疏好難炒，而且重要望國企股生性。
章盛