前一排好多OnlineGame場老闆都大叫生意難撈；一來隻新版「彩虹6仔」大脫腳，推出日期一拖再拖，搞到Game場冇新遊戲接棒。好啦，以為等到隻《魔獸爭爆》可以撐吓個市啦！點知反應都係一般，事關好多人都係喺屋企玩，只係旺Game唔旺場！Online場救市之作最近終於出現啦！呢隻就係第一身射擊嘅《BATTLEFIELD1942》。
好多人玩過都話佢集合咗「GR」嘅實戰感覺，同「CS」重新再戰嘅爽快感，不過最重要都係Game裏面除咗一般槍械之外，竟然連坦克、登陸艇、風琴式火箭炮車、戰鬥機、轟炸機、炮艦同航空母艦都全部有得揸，絕對係近期勁搞鬼之作！難怪一出就成為Online場最Hit之作。
不過筆者認為呢隻Game最厲害之處，都係佢擁有64人同時連線對戰嘅功能，真係閒閒哋一隻Game就可以包起成個場，真人上陣對打同打電腦啲嘍囉感覺真係差好遠！
文：PC魂